ARSARNERIT INUUSUTTAI

SOOQ

Nunarsuarmi nunani tamani aalaffiunerpaalertussatut takorluugaqarnermi #Aalasa, suli amerlanerit peqataatilerniarlugit pisariaqarpoq timersorneq allaanerusumik eqqarsaatigalugulu isiginissaa. Meeqqat inuusuttullu timersortartut ikiligattuinnarput ingammik meeraanermiit inuusuttuaranngulernermi inuusuttuararpassuit timersortarunnaartarput.

Taamaattumik pingaaruteqartorujussuuvoq inuusuttut paasiniaaffiginissaat, siunnersuuteqarniassammata suut aalanerulertikkusussaneraatsik aamma ikinngutitik peqatigalugit. Qanoq aaqqissorneqassanersut – taavalu sammisat digital-iusut aqqutigalugit qanoq peqatigiiffinni atorneqarsinnaanersut paasiniarlugu. Tamakkua allarpassuillu 8.-10. klassertuniit siunnersuusiorfigineqarumaartut neriuutigaarput.

SUNA

Pilersitsinermut aningaasaateqarfik ’Fonden for Entreprenørskab’ ukiut tamaasa suliniut Edison ingerlattarpaat, nuna tamakkerlugu ilinniartitsisorpassuit aallartisaanernut suliffeqarfiliornernullu tunngasunik ilinniartinneqartarlutik.

Ilinniartitsissutissat ilinniartitsisut tunineqartarput, atuartitsissutissatut malittarisassanut pioreersunut tulluussakkanik. 

Sammisami tassani, inuusuttut nutaaliornernut suliffeqarfimmillu ingerlatsinissamut tunngasunik misiliinissaminnut periarfissaqartarput, taamaasillutik piukkunnartunik ineriartortitsinissaminnut sakkussaqalerlutillu ilisimasaqalertarput.

QANOQ

Atuarfiit tamarmik isumassarsiatsialammik suliniutaasussamik toqqaasarput. Suliniut Arsarnerit Inuusuttai-nut saqqummiunneqartarput, tassa suliffinnik aallartisaanermut pissartanngorniunnertut taaneqarsinnaasumi. Tassani isumassarsiatsialaat suliniutillu piukkunnarnerit ajugaasutut qinerneqartarput – taakkualu tamarmik timimik aalatitsinerulernissamut siunertaqartarput. 

Taanna pivoq Sisimiuni ulloq 11. novembari, qanilliartorneranilu inuusuttut peqataasussat assigiinngitsunik misiliinnissaminnut periarfissinneqarput, soorlu makkuninnga: Nikuilluni paarfiusartumik (Stand Up Paddle), GAME aammalu suleqatigiilluni alutornartunik ilusilersuinermi/pilersitsiniarnermi.

KIKKUT

Aningaasaateqarfik ’Fonden for Entreprenørskab’, Qeqqata Kommunia aammalu Timersoqatigiit Kattuffiat – Qeqqata Kommuniani Nammineerlutik Inuussutissarsiutillit suliniut suleqatigiissutigaat.