Malittarisassassinnik suliaqalersigasi eqqarsaatigisariaqarparsi suniarnerlusi (peqatigiiffiup siunertaa) ingerlatat suut peqatigiiffimmi neqeroorutaassanersut qanorlu aaqqissorneqassanerlusi:

Peqatigiiffiup siunertaa

• Peqatigiiffissinni tunngaviusumik susarniarpisi?
• Peqatigiiffiup naleqartitat suut toqqammavigissavai?
• Suna sulissutiginiarpisiuk?

Peqatigiiffiit arlaqartut timersuummik aalajangersimasumik siuarsaaniarlutik suliniuteqartarput. Imaassinnaavoq kikkut tamaasa, qanorluunniit suiaassuseqaraluarpata, ukioqaraluarpata, sumiuussuseqaraluarpataluunniit timersornissaannut periarfissinniarisi. Najugaqarfissinniluunniit innuttaasut peqqissuunissaat ingerlalluarnissaallu sulissutiginiarpisiuk? Ilissi nammineq aalajangigassaraarsi suliniutersi suussanersoq.

Peqatigiiffiup ingerlatai:

• Ingerlatat suut siuarsaaffigissallugit kissaatigaasigit? Ingerlatat peqatigiiffiup siunertaanut atalluinnartussaapput. Sumiiffimmi aalajangersimasumik meeqqat aalanerulernissaat, peqatigiinnerulernissaalluunniit siuarsaaffigissallugu kissaatigisimasinnaavarsi, taamaassapput taava sumiiffimmi meeqqat peqatigiillutik aallutassaannik pinnguarlutillu timimik atuillutik pinissaannut neqerooruteqarlusi.

Peqatigiiffiup aaqqissugaanera:

• Peqatigiiffimmi oqartussaaqatigiinneq qanoq aaqqissorneqassava?
• Ulluinnarni kikkut qassillu akisussaasuusassappat kiallu suut aalajangiiffigisassavai?

Aaqqissuussaanermut kissaatisi, akisussaaffimmik agguaassineq, piginnaasallu peqatigiiffiup aalajangersagaanni ersissapput, kommunemik akuerineqarnissamut tapiiffigineqarnissamullu taakkua naammassisimanissaat pingitsoorneqarsinnaanngillat.

Iliusissap tulleraa peqatigiiffiup malittarisassaanik siunnersuusiorluni suliaqarnissaq. Peqatigiillusi aallussinissinni aalangersagaatisi najoqqutarineqartartussaapput.

Peqatigiiffiup piuneranut aalajangersakkasi avammut uppernarsaataasussaapput, aalajangersakkallu paragraffinik immikkoortunillu arlalinnik imaqartuaannarput, taakkualu peqatigiiffimmiit peqatigiiffimmut atorneqartarput, soorlu siunertaq, sumi angerlarsimaffeqartuuneq (najugaqartuuneq) aqutsisut, aningaasaqarneq aammalu atorunnaarsinneqarnissaq.

Malittarisassat erseqqarissumik allanneqarsimanissaat pingaaruteqarpoq, suut atuunnersut ilisimaniassagassiuk, arlaatigut nalornisoqalerlunilu aporaattoqalissagaluarpat taakkua najoqqutaasussaammata. Malittarisassat arlaliulluni oqaloqatigiissutigisarlugit allakkaanni iluaqutaasarpoq, allatassi isumai sumut tunnganersut tamassi qularutigissannginnassiuk.

Malittarisassatut siunnersuusiasi ilusilersorlugillu, eqqartorlugillu suliarilluareerussigit taava pilersittissutaasumik ataatsimeersuartitsinissamut qaaqqusisoqassaaq.
Pilersitsissutaasumik ataatsimeersuarneq peqatigiiffimmik pisortatigoortumik pilersitsinerusarpoq. Kikkullu tamarmik peqatigiiffimmut soqutiginnittut pilersitsinermut aggersinnaatitaapput. Attaveqarfissinnut tamanut qaaqqusigisi, najukkassinnilu nivinngaavimmut nivinngaallusi, soorluttaaq innuttaasut attaveqaataasigut pilersitsinissaq saqqummiussiffigalusiuk.
Ataatsimeersuarnissamut pilersitsiffiusussamut qaaqqusinissinni innersuussutigissavarsi assersuutigalugu nittartagassinni malittarisassat atuarneqarsinnaaneri, soqutiginnittut malittarisassatut siunnersuutit suunersut qimerloorsinnaaniassammatigit.
Pilersitsinertalimmik ataatsimeersuartitsinermi malittarissassasi ataasiakkaarlugit sammineqassapput, peqatigiiffiullu suliassaanik pilersaarusiortoqassalluni, minnerunngitsumillu siulersuisussanik qinersisoqassalluni. Ataatsimiittoqannginnerani kikkut siulersuisuunissaminnut soqutiginninnersut paaseriissallugit isumassarsiatsialaassaaq, ataatsimeersuarnermilu kina aqutsisuussanersoq aalajangiutereerlugu. Pilersitsiffiusumik ataatsimeersuartitsinermi oqaluuserisassanut assersuutaasinnaapput ukua:

Tikiulluaqqusineq

1. Aqutsisussamik toqqaaneq: Aqutsisup akisussaaffigissavai ataatsimiinnermi aqutsinissaq aammalu oqaluuserisassat tulleriiaarneqarnerisa malinneqarnissaat. Soorlu allani ataatsimeersuarnerni pisartutulli.
2. Imaqarniliortussamik toqqaaneq: Inummik toqqaagitsit, isumaqatigiissutigineqartunik aalajangiinernillu allaaserinittussamik.
3. Oqaluttuarneq: Oqaluttuarisiuk kikkuunerlusi, peqatigiiffik suunersoq, soorlu peqatigiiffiliorniarnerlusi.
4. Takorluugaq/Anguniagaq: Ataatsimeeqataasut oqaloqatigisigit ilissi taakkualu siunissamut takorluukkasi suunersut pillugit. Ukioq ataatseq qaangiuppat peqatigiiffik qanoq isikkoqassava? Ingerlatassat suut neqeroorutaassappat, kikkut aammalu ilaasortat qanoq amerlatigippat?
5. Malittarisassatut siunnersuutit: Malittarisassatut siunnersuutit tulleriiaarlugit eqqartoorsigit, peqatigiiffimmi malittarisassat suut atuunnersut qularnarunnaartillugit.
6. Siulersuisunik qinersineq: Siulersuisussanik siunnersuuteqarlusilu qinersigitsi.
7. Kukkunersiuisussamik toqqaagitsi: Kukkunersiuisoq sulerisarnersoq oqaluttuarisiuk paasiniarsiullu kina kukkunersiuisoorusunnersoq.
8. Tamalaat: Oqartoqartarpoq tamalaani suulluunniit eqqartorneqarsinnaasartut, aalajangiiffigineqarsinnaanatilli.

Pilersitsissutaasumik ataatsimeersuarneq naammassippat, imaqarliniarlu siulittaasumit aqutsisumiillu atsiorneqareerpata taava peqatigiiffittaaq atuutilertarpoq. Ataatsimeeqataasut ilaat isumassarsiaqarlutillu kissaateqarpata siulersuisut sulinissaminni ilanngussinnaavat, taamaaliornissaminnulli pisussaaffeqanngillat.

Ingerlatassat aallartittussanngorpasi. Siulersuisunngortullu sulisussanngorput. Imaassinnaavoq siullertut kommunemut qinnutiginiarsarigissi innuttaasunik qaammarsaasutut peqatigiiffiusutut nalunaarsorneqarnissarsi, taamaasillusi tapiiffigineqarnissamut ingerlanniakkassinnullu inigisartagassassinnut tapiiffigineqarniassagassi. (Innersuussineq?)