ATAATSIMOOQATIGIINNEQ ANNERTUSARUK PITSAANERULERSILLUGU
Sungiusaasutut kajumissutsimilluunniit suliaqartutut ataatsimoornerup nukittorsarneqarnissaanut pingaarutilittut inissisimavutit. Illit peqqutaaqataallutik peqataasut ataatsimoornermi sammisamiluunniit peqataasutut misigitinneqassapput. Aalaqatigiiginnassanngilagut, ataatsimoorfimmili peqataasutut misigisimassaagut. Peqatigiiffimmiliuna ataatsimuussuseq qanoq pitsanngorsarsinnaagipput? Periusaasinnaasut tallimat ataani allassimasut atuakkit.
Peqatigiiffimmi sungiusaasutut ataatsimuussuseq ima pitsanngorsarsinnaavat
Peqatigiiffilerineq ulluinnarni ulapaarfiusumit allamut saalaarfittut atorneqartarpoq. Nalunngilarpullu peqatigiiffilerineq tarnigissaasartoq, tassami…A – aalaffiusarmat
B – ataatsimoorfiusarmat aammalu
C – siunertalittut misiginarmat
Timersornermi allatigullu sammisaqaqatigiinnermi peqataaneq tarnigissaataasarpoq. Taamaattumik peqatigiiffiit innuttaasut ilorrisimaarnissaannut peqqissusaannullu pingaaruteqartorujussuupput.
Taamaattumik timersortilluta qulaani A-mi B-mi C-milu allassimasut misigisariaqarpagut.
Nalinginnaasumik aalanissarput ilisimavarput (A) – taamaattumik eqqaamassavarput ataatsimoornermi peqataanerup aammalu (B) siunertalittut misiginissap annertusarnissaa.
Pingaarutilittut inissisimavutit
Kalaallit Nunaanni sungiusaasutut kajumissutsimilluunniit suliaqartutut ataatsimoorfinni toqqissisimalersitsisutut, tunngaviliisutut siunertaqalersitsisutullu pilersitseqataavutit, tassanilu meeqqat tarnikkut timikkullu peqqinnartumik ineriartornissaannut periarfisseeqataallutit..Ataatsimoorfiit aqqutigalugit meeqqat amerlanerusut timersorusunnerulersinneqassapput, taakkunanimi tikilluaqqusaasutut toqqissisimasutullu misigitinneqassagamik – qanorluunniit suiaassuseqaraluarunik, inuiaassuseqaraluarunik, oqaaseqaraluarunik tunuliaqutaqaraluarunilluunniit. Peqatigiiffigisanni allanngueqataaniarlutit ataatsimuussutsillu pitsaanerulernissaanut iliuuserisinnaasatit tallimat aakua:
- Peqataasussat nutaat tikilluaqquneqartutut ikiorneqartutullu misiginiassammata tikilluaqqusisartussamik toqqaagit
- Ataatsimoorneq iloqqasunngornermik aallartittarlugulu naggasertaruk, tassuuna ilaasut ataatsimoorfimmi peqataasutut misiginiassammata
- Aallartinnginnermi ILLIT eqimattalioreertassaatit. Taamaaliornikkut peqataasut allanngorartinneqassapput nutaanillu naapitaqartassallutik
- Kissasserneq nuannersuutiguk, qungujunnassaaq, nuannaalernassaaq ataatsimoornassallunilu
- Kukkusinnaaneq inissaqartiguk. Misiliinissamut kajumissaarigit paasinnillutillu, iluatsinngikkaluarpataluunniit – kukkussutit ilinniarfigineqarniassappata kukkunerit pillugit eqqarsaatersuutaasinnaasunik apeqqusiigit. Toqqissisimalersitsissaatit, tassanilu kukkusinnaassapput ineriartorsinnaassallutillu
Eqqarsaatersuut: illit peqatigiiffigisanni sungiusaagaangavit ataatsimoornissaq qanoq eqqumaffigitigisarpiuk? 1-mit 10-mut akissuteqarfissaq.
Nalunngiliuk ...
Timersoqatigiiffiit Kattuffiata ilaatigut UNICEFF Kalaallit Nunaat suleqatigalugu meeqqat inuusuttullu ataatsimoorfinni aalaffiusuni peqataanerulernissaannut sinaakkutinik pitsanngorsaasut? Suliniut ”Ataatsimoorluta Aalasa” pillugu sukumiinerusumik atuarsinnaavutit, tassanilu ilaatigut ikiorneqarsinnaavutit paasisaqarsinnaallutillu meeqqat qanoq sikkerartinneqarsinnaanersut.
