Meeqqanut timersorneq patajaannerulersinneqarpoq
Timersoqatigiit Kattuffiata meeqqat pillugit isiginneriaatsini meeqqallu siunnersuisoqatigiivi ”Peqataasa”-mik taaneqartut nutaat avammut nalunaarutigai. Meeqqat pillugit isiginneriaatsip meeqqat toqqissisimallutik tikilluaqqusaallutillu timersornermik aallussaqarnissaat qulakkiissavaa, meeqqallu siunnersuisoqatigiivisa 14-inik ilaasortaqartussap meeqqat isumaasa timersornerup silarsuaani tusaaneqartarnissaat anguniartassavaa.
Meeqqat pillugit isiginneriaaseq meeqqallu siunnersuisoqatigiivi nutaajusut Timersoqatigiit Kattuffiata, UNICEF-ip, Paarisap kiisalu Innuttaasut Peqqissusiannik Ilisimatusarfik suleqatigiillutik suliniutaannit ”Ataatsimoorluta Aalasa”-mit pilersitaapput. Meeqqallu pillugit isiginneriaasissap imarisaanut kattuffiit, sungiusaasut, angajoqqaat meeqqallu ilanngussaqarsimapput, taamaalillutillu aalajangersakkanik pingaarutilinnik Kalaallit Nunaanni timersornikkut meeqqat pisinnaatitaaffiinik pitsaasumillu atugaqartitaasutut misiginissaannut siuarsaataasussanik suliaqaqataallutik.
Timersoqatigiit Kattuffiata siulersuisuini siulittaasup tullia Bolethe Stenskov oqarpoq:
”Meeqqat timersortartuni pingaarnerpaapput. Taamaattumik meeqqat kikkulluunniit toqqissisimallutik tapersersorneqarlutillu timersorsinnaanertik pisinnaatitaaffigaat. Meeqqat pillugit isiginneriaatsimik meeqqallu siunnersuisoqatigiivinik pilersitsinitsigut meeqqat tusaaneqartarnissaat kisiat kissaatiginngilarput, aammali meeqqat isumaat pisariaqartitaallu naapertorlugit iliuuseqartoqartarnissaa kissaatigalugu. Meeqqat peqatigiiffii peqataatitsinerlu meeqqat kikkulluunniit tikilluaqqusaasutut pingaartinneqartutullu misigalutik timersortarnissaannut pingaarutilerujussuupput.”
Timersoqatigiit Kattuffiata meeqqat pillugit isiginneriaasianik atuutilersitsineq ilaatigut ”Ataatsimoorluta Aalasa”-p sinerissami workshoppeqartitsisarneratigut, peqataasunit meeqqat pisinnaatitaaffii timersoqatigiiffinnilu toqqissisimatitsinissamut atortussat assigiinngitsut pillugit paasisaqarfigineqartarsimasutigut, pilersinneqarpoq.
”Peqataasut inersimasut timersoqatigiiffinni kajumissutsiminnik ikiuuttartut paasisimalikkatik timersornikkut patajaatsumik ileqqoqalernissamut atorsinnaavaat, aammalu meeqqat inuusuttullu pillugit iliuuseqassagaangatta paaseqatigiittarnissarput ataatsimoorussatsinnillu aallaaveqartarnissarput qulakkiissallugit. Tamatuma meeqqat pillugit timersornermi qanoq sulisarnissatsinnut suleqatigiittarnissatsinnullu aalajangersakkat erseqqinnerulersissavai, inersimasullu timersornerup ingerlanneqarnissaanut isumalluutigisavut meeqqat pisinnaatitaaffiinik aallaaveqarlutik sulisarnissaannik toqqammavississallugit. Taamaattumik inersimasut meeqqanik sullissaqarlutik kajumissutsiminnik ikiuutaasartut kikkulluunniit workshoppeqartitsisarnitsinnut peqataasarnissaat kissaatigaara,” Bolethe Stenskov erseqqissaavoq.
Timersoqatigiit Kattuffiata nittartagaatigut www.gif.gl-ikkut Facebookimilu qupperneratigut Ataatsimoorluta Aalasap workshoppeqartitsinerata sumi qaqugulu pinissaa ilisimatitsissutigineqarumaarpoq.
Paasissutissaq
Timersoqatigiit Kattuffiata meeqqat pillugit isiginneriaasia aamma meeqqat siunnersuisoqatigiivi suliniummut Ataatsimoorluta Aalasamut KNI-mit Nordea-Fondenimillu tapersersorneqartumut, ilaapput.
Paasisaqarnerorusuttunut attaveqarfissaq:
Bolethe Stenskov
Timersoqatigiit Kattuffiata siulersuisuni siulittaasup tullia
+299272866
bolethe@gif.gl
