Naatsorsuusiortussaanermik inatsit naapertorlugu naatsorsuutinut atortut ataavartumik nalunaarsorneqassapput. Nalunaarsugassat kingornamut toqqortarniarukkit aningaasanut tunngasut erniinnaq malinnaaffigiunnaarsinnaavatit.

Taamaattumik

• isertitat aningaasartuutillu ataavartumik nalunaarsortakkit
• siulersuisut ataatsimiinneri tamaasa aningaaserisoq aningaasaqarnerup qanoq inneranik saqqummiussitittarsiuk
• pisussat missingersuutit eqqarsaatigalugit naatsorsuutinut nikinganeqalersitsisussat pillugit siulersuisut ilisimatinneqartassapput.

Naatsorsuutinut inissitsiterinerit ataasiakkaat saniatigut pingaaruteqarpoq naatsorsuutit ukiumut naatsorsuutit inernerannik ukiullu naanerani aningaasatigut inissisimanermik eqqornerusumik ersersitsinissaat.

Angusanik naatsorsuutit isertitanut aningaasartuutinullu piffissanik inissitsiterinermut tunngasuuvoq:

• Pisoqqanut nutaanulluunniit attuumassuteqartunik ukiumi nutaami aningaasartuuteqartoqarpa?
• Ilaasortat akiliutaannit isertitat qanoq amerlatigisut ukiumut qaangiuttumut nutaassamulluunniit attuumassuteqarpat?

Agguataarinermut tunngavinni (pigisat aamma akiitsut) bilagit avataaneersut atorlugit naleqquttunngorsaasarnissaq pingaaruteqarpoq:

• Aningaaserivimmi uninngasuutit kontup killiffianik ilisimatitsissummut aningaaserivimmeersumut naleqquppat?
• Karsimiittuutit tigussaappat?
• Sanaartornernut aningaasaliinernulluunniit annerusunut taarsigassarsiat taarsigassarsisitsisup takussutissiaanut naapertuuppat?
• Ilaasortat akiliutaat pisassat katinnerat eqqorpa? Naatsorsuutigineqarpat aningaasat tamakkerlutik ukiumi naatsorsuusiorfiusumi nutaassami akilerneqassasut?

Peqatigiiffiup tamakku isumaliutigereersimappagit kingornalu malippagit ilerasuuteqarasi oqarsinnaavusi ukiumut naatsorsuutit inerneri eqqornerusumik takutitsisuusut.

Peqatigiiffiit amerlanerit kommunimit tapiissutisisarput. Aalajangersakkani allassimavoq peqatigiiffik kommunip tapiissutigisaanut taakkununnga naatsorsuusiortassasoq inatsimmullu naapertuuttumik aningaasaliissutit atorneqarnerannut naatsorsuutinik uppernarsaasiortassasoq.

Peqatigiiffiup isumagissavaa peqatigiiffiup nammineerluni naatsorsuutaasa atortullu kommunimut nassiunneqartut imminnut naapertuunnissaat. Peqatigiiffiittaaq ukiumut naatsorsuutit inerneri nalinginnaasut nassiuttussaavaat.

Tapiissutit pillugit naatsorsuutit immikkut ittut peqatigiiffiup naatsorsuutaasut ukiumut naatsorsuusiarineqartariaqanngillat.

Ataatsimeersuarnissaq sioqqulluarlugu aningaaserisup ukiumut naatsorsuutit inerneri siulersuisunut saqqummiuttariaqarpai. Siulersuisut naatsorsuutit akuerissutigissanngilaat inerneralli ilisimasussaallugu. Aningaaserisup akisussaaffigaa naatsorsuutit suliarissallugit ataatsimeersuarnissarlu sioqqullugu kukkunersiuisussatut toqqarneqarsimasunut iluarsaatitissallugu.

Ataatsimeersuarnermi angusanik naatsorsuutit aamma aningaasat isertitat aningaasartuutillu assigiinnerat ilaasortanut misissortinneqassapput. Nalinginnaasuuvoq aningaaserisuusup tamatuminnga isumaginnittuusarnera, tamannali siulersuisut sinnerlugit pisarpoq, taakkualu saqqummiunneqarnissaannut siulersuisut akisussaasuusarput. Missingersuutit imaluunniit naatsorsuutit siulianeersut eqqarsaatigalugit nikinganerujussuaqarsimappat nassuiaasoqartariaqarpoq. Tamatuma kingornagut ataatsimeersuartut ukiumut naatsorsuutit inerneri akuerissavaat.

Ilaasortat tamarmik peqatigiiffiup ukiumut naatsorsuutaasa inernerinik paasisaqarsinnaatitaapput aammalu qanoq ilisukkulluunniit assilineqarneranik (kopiianik) piumasinnaatitaallutik. Ataatsimeersuarneq sioqqullugu siulersuisut inernerusoq paasereertussaavaat, kisianni ataatsimeersuartut tassaapput ukiumut naatsorsuutit inernerinik akuersisussaasut.

Siulersuisut missingersuutit akuerisaraat? Taava missingersuutit siulersuisut iluminni atortussaraat ilaasortat takussallutit piumasaqaateqarfigisinnaanngisaat.

Ataatsimeersuartut missingersuutit akuerisaraat? Taava ilaasortat taakku takussallugit piumasaqarsinnaatitaapput.

Imaqarniliat siulersuisut iluminni atortussaraat ilaasortat takussallutit piumasaqaateqarfigisinnaanngisaat. Peqatigiiffippassuaqarporli ataatsimiinnernit imaqarniliaasimasunik nittartakkakkut tamanut saqqummiussisartunik.

Siunnersuut: Peqatigiiffik imaappat virk.dk-mi Qitiusumik Suliffeqarfinnik Nalunaarsuiffimmut (Erhvervstyrelsemut) nalunaarutigineqassaaq:

• akileraartussaatitaappat
• pisortanit tapiiffigineqartarpat
• peqatigiiffiup aqqa atorlugu peqatigiiffik aningaaserivimmi kontoqartoqarpat kontoqassappalluunniit

Peqatigiiffimmi allannguisoqarpat peqatigiiffilluunniit unippat tamanna nalunaarutigineqassaaq.