1. Timersoqatigiinnissamut ileqqut attatiinnakkit
Timersornissamut isumaqatigiissutit timimik aalatitsinissatsinnut isumalerujussuupput. Amerlanerpaartagut sungiusariassallutik aninissaminnut ajornannginnerutittarpaat isumaqatigiissusiorsimagunik, utaqqineqarlutillu. Taamaattumik kattuffiit aqqutigalugit timersornerit aasaanerani unikkallaraluartut, sungiusaqatissannik isumaqatigiissusioqateqarit. Inuk ataaseq imaluunniit arlaqarlusi, ataatsimoornissarmi piumassusinititsisarmat. Ataatsimooreersunik peqataaffigisinnaasannik soqanngippat, immineq aallartitsinissannik isummersorit, pisuttuaqatigiittartut/arpaqatigiittartut/timersoqatigiittartut.
2. App-it aamma online-nikkut sungiusarnissamut malitassat
Allatut piumassusissarsiorfiusinnaavoq online-kut sungiusarnissamut malitaqarneq imaluunnit app-it atorlugit sungiusarneq. Aamma angerlarsimaffimmi qanoq sungiusarsinnaanerlutit malitassaqarluarpoq.
Online-kut sungiusarluni malitassat isumassarsisitsisinnaapput nutaamik nuannersumillu sungiusarnissamut. Assigiinngitsorpassuupput (ass. qasujaallisarnissarluni, nukkassarnissarluni, qasukkarnartunik, yoga/meditationi il.il.) tamanut naleqquttut.
Sungiusarnissamut app-it aamma siuariartorninnut takussusiisinnaapput piumassusinnut iluaqutaalluarsinnaasumik.
Aajukua isumassarsiorfigisinnaasappit ilaat:
3. Piniarit
Tuttunniarneq 1. august aallartippoq. Piniarneq timit tamaat nukkassartarpaa, silaannarissaatigalutit seqinnisaarlutit. Minnerunngitsumillu mamarluinnartunik nerisassanik angerlaassissallutit, ilaquttatillu nukersorsimanissinnut akilerneqarlusi. Eqqaamajuk tuttunniartinnak sungiusaleriissagavit, timippit artorsarnissaanut piareersarlugu!
4. Pinngortitaq sungiusarfissaraat
Pinngortitaq ´pinnguartarferujussuuvoq` sungiusarfissaalluarlunilu. Takorluuisinnaanerup kisimi killilersinnaavaa qanoq timimik aalatitsinissamut atorluarneqartigisinnaanera. Periarfissaajuaannarpoq – akeqarnanilu. Pinngortitami arpassinnaavutit, ujaqqat orpikkallu atorlugit pissittaarnermi sukkaniuunnermilu sungiusarfissaliorsinnaallutit. Ajornannginnerulaamik perusukkuit aamma paarnartarnissamut, naasunik, pupinillu katersinissamut piffissaalluarpoq.
5. Qaqqaliarit
Uummatippit kassunnera sakkortusisarusukkukku, qaqqanik qaqisaqarneq tulluarluinnarpoq. Tassani nissut nulullu sungiusassavatit, aammalu aappit ingerlaarneranut iluaqutaassalluni. Qaqqap qaanut piguit timinnut iluaqutissarpassuit saniatigut aamma eqqissisimaneq isikkiviginnersuarlu pissarsiarissavatit.
Akornisigut intervalinik akusarsinnaavatit, sukkasuumik qummut ingerlallutit kigaattumillu ammukarlutit. Ujaqqamiit ujaqqamut pissittaarlutit, assigisaanillu. Qaqqaliarnissamut piffissaqanngikkuit assigisaanik najukkappit eqqaani majuartarfinni sungiusarsinnaavutit.
