Nunani tamalaani timersuutaasartut nunatsinni ingerlanneqarnerisigut nunatsinniititserusulernerit ingerlatserusulernerit ingerlanneqarnissaallu anguniagaavoq,  aaqqissuunerisalu kingunerisaanik malunnaatilimmik sunniuteqartoqartussaalluni soorlu makkunatugut:    

• Timersornerup tungaatigut annertuunik misigisassaqartitsinissaq, kalaallinik peqataatitsillunilu pikkusuttitsisussaq, kajumissutsiminnillu ikiuuttunik tanngassimaartitsillunilu peqatigiinnermik sumiiffimmullu attuumassuteqartitsilersumik    
• Timersorneq erseqqarinnerulersillugulu pilerinartunngortillugu    
• Nunani tamalaanit takornariarusuttunut kajuminnerulersitsisariaqarpoq inuussutissarsiutitigullu piorsaaqataalluni (sumiiffiit pititsinernik aallutaqartut aammalu inuussutissarsiutitigut siuarsaaqataallunilu avammut tunisassianut niueqateqarnermullu iluaqutaasussamik il.il.)  

• Nunatsinni timersorneq, Timersoqatigiit Kattuffiat aammalumi nunarput avammut nunanut tamalaanut timersorfiusartutut ussassaarutigalugu.  

Timersoqatigiit Kattuffiat taamaalilluni pisussanut makkununnga tapiissuteqarsinnaavoq:  

Nunanut allanut unammisartunut aaqqissuineq   

Timersoqatigiit Kattuffiat ikiuussinnaavoq nunani tamalaani unamminerit nunamut sinniisuusinnaanissamut unammisoqarnissaanullu. Aaqqissuussat inersimasunut nunani tamalaani timersornikkut qaffasissumik inissisimasariaqarput – soorlu nunarsuarmi europamilu pissartanngorniunnerusinnaallutik,  aammali nunani tamalaani timersuutaasartut nuimanerit aalajangersimasut aamma pineqarsinnaapput, ingammik pititsissarnissaq ungasinnerusumut isiginnittumut attuumassuteqartuuppat.   

Timersoqatigiit Kattuffiata nunani tamalaani timersornermik ingerlatat tapiiffigalugillu ukioq ataasikkaartumik tapiiffigisinnaasarpai (soorlu VM/EM) aammali utikaattumik nunani tamalaani timersuutinut ingerlanneqartartunut tunngasut tapiiffigisinnaallugit.  Utikattumik pisussat aallartisarneqarneranniluunniit tapiiffigineqarsinnaapput – pisumi pisariaqartinneqartut suunersut apeqqutaallutik – aammalu/imaluunniit ineriartortitsinissaq siunertaralugu, taamaasilluni Kalaallit Nunaannut malunnaataasumik pititsinerusinnaammat qulaanilu sunniuteqarfissatut taagorneqartunut iluaqutaasinnaasunngorniassammat.    

Tamanut timersornikkut pisoqartitsinerit   

Timersoqatigiit Kattuffiat timersuutinut amerlasuunik aallunneqartartunut unamminerit ingerlanneqarsinnaalernissaannut ikiuussinnaallunilu piviusunngortitseqataasinnaavoq, sunniutissatut kissaatigisanut iluaqutaasinnaassappat imaluunniit nunanut allanut unammisartut nunatsinnut ornigunnissaannut pilerisulersitsisinnaasussaalluni.  Timersoqatigiit Kattuffiata aammalu timersuutit amerlasuunik aallunneqartartut nunanit tamalaanit peqataaffigineqarsinnaalernissaa tapersersorsinnaalluarpaa. Aaqqissuussanullu tamakkununnga pisut pitsaassuseqartuarmik peqataasunullu nuannersumik misigititsilluarnissaannut tapiissuteqarlunilu ikorfartuisinnaavoq soorluttaaq sunniuteqaatigerusutanut iluaqutaalersinnaaniassammat. Timersoqatigiit Kattuffiat timersuutinut amerlasuunik peqataaffigineqartunut ukioq ataasikkaartumik tapiisinnaallunilu aamma utikattumik kalaallinik/nunani tamalaanik amerlasuunut pititsinernut tapiissuteqarsinnaalluarpoq.   

Timersuutit amerlasuunik peqataaffigineqartartut ineriartortinneqarnissaannut tapiisoqassappat, taava pisoqartitsinerup ungasinnerusumik isiginnittumik peqataanerulersitsisinnaanissaa aammalu tusaamasaanerulersitsinissaata annertussusissaa isiginiarneqartussaassapputtaaq.  Timersuut amerlasuunik peqataaffigineqartartoq immikkut pisussatut tapiiffigineqarsinnaavoq, imaluunniit aamma nunanut allanut unammisartunut unammisitsinermut ilanngullugu ingerlanneqarsinnaalluni (immikkut saniatigut ingerlanneqartutut). Timersortartunik amerlasuunik ingerlanneqartartunik ataatsimik aaqqissuisoqassappat, taava tapiissutigineqartoq nunanut allanut unammisartunut tunngasumut ilanngullugu tapiiffigineqartussaassaaq, timersuummut amerlasuunik aallunneqartartumut aningaasaliissutissanik immikkut atugassanngortitsisoqarsinnaavoq.  

Ataatsimeersuarnerit ataatsimiinnerillu nunanit tamalaanit peqataaffigineqartut   

Timersoqatigiit Kattuffiat timersornermut tunngasunik ataatsimeersuarnernik ataatsimiinnernillu, soorlu kattuffiit timersortartoqatigiit ataatsimiinnissaannik nunatsiniititsinissamut ikiuussinnaallunilu tapiisinnaavoq. Ataatsimeersuarnernut ataatsimiinnernullu tunngatillugu taamaallaat annerusumik tapiiffigineqartarput:   

• Nunanut allanut unammisartunut/timersuutinillu amerlasunik aallunneqartartunik pilerinarsaataasinnaasutut atorneqarsinnaappata  
• Kalaallit Nunaanni timersornermik politikkikkut aallutallit nunani tamalaani suleqataasussatut qinerneqarnissaat aqqutissiorneqarsinnaassappat   
• sunniutaasinnaasutut kissaatigisanut iluaqutaasinnaassappat  

Kattuffiit peqatigiillu makkua qinnuteqarsinnaapput:   

1. Timersoqatigiit Kattuffiata ataani Kattuffiusut 
2. Klubbit timersoqatigiiffiillu Timersoqatigiit Kattuffiata ataani immikkut kattuffeqanngitsut 

Timersoqatigiit Kattuffiata aningaasanik tapiinissaminut pisussaq tamakkiisumik nalilersuiffigeriarlugu  piumasaqaataasut makkua aamma aallaavigisussaavai (allannerisa tulleriiaarneri pingaarnersiuineq malillugu tulleriiaagaanngillat) Nunatsinnilu timersornerup ineriartorfigisinnaasai aallaavigalugit aamma naliliisoqartussaavoq. Nalilersueqqissaarnermi piumasaqaatinillu naammassinnissimanermut makkua aallaavigineqartussaapput:  

Kalaallit akuliutsinneqarnerat: Pisoq nuna tamakkerlugu assut eqqumaffigineqassaaq timersornerlu sammineqarluartilerlugu. Kalaallit amerlasuut pisumut isiginnaartuupput aammalu/imaluunniit nuna tamakkerlugu tusagassiutitigut assut sammineqassaaq imaluunniit – timersortartunik amerlasuunik peqataaffigineqarpat – taava Kalaallit Nunaat timersuummi ingerlanneqartumi peqataassaaq.  Pisumilu najugaqartut peqataatinneqarluassapput, soorlu najukkami timersuutigineqartup saniatigut allanik pisoqarluni aammalu peqatigiinnerit suleqatigiinnerillu pilersinneqassallutik – soorlu najukkami inuussutissarsiortut ingerlanneqarneranut peqataalluartillugit.  

Aaqqissuussaanikkut nammassinnaassuseq: Aaqqissuisut pititsinernik misilittagaqarluassapput aaqqissuussarlu pitsaalluinnartumik piginnaaneqarfigilluarlugu iluatsilluarsinnaassallugu, pitsaanerpaamik aningaasatigut iluanaarfiulluartumik. Aaqqissuussisut illoqarfimmiittunik/illoqarfinnik peqataasunik suleqateqarluassaaq aaqqissuussatullu pisumi suleqataasunik tamanik suleqateqarluassalluni.  

Nunani tamalaani maluginiarneqassaaq ussassaarutaasumik: Pisoq aqqutigalugu Kalaallit Nunaat nunani allani ussassaarneqarluassaaq timersornerullu silarsuaani Kalaallit Nunaat inissilluartillugu. Pisoq nunani tamalaani tusagassiutini, TVkut innuttaasulluunniit attaveqaataatigut assut sammineqassaaq il.il.  

Timersornerup tungaatigut piumasaqaatit: Timersuut aallunneqartoq nunani tamalaani qaffasissumik ingerlanneqarsinnaasutut nalilerneqassaaq, timersuutaasut tungaatigut nalinginnaasumillu timersornerup tungaatigut.   

Timersornerup ineriartortinneqarnera: Aaqqissuussinertigut Kalaallit Nunaanni timersornerup silarsuaata ineriartortinneqarneranut ilalertuutaassaaq, soorlu soqutigineqarnerulerneratigut, ilaasortaaffigineqarnerulernermigut, ineriartortittassanullu tapertaalluassalluni, atuarfik/Sunngiffimmi ornittagaq/klubbemillu suleqateqarneq, taamatuttaaq suleqatiginnittoqalernerit aammalu atortut pitsanngorsarneqarnerinik pilersinneqarnerinilluunniit angusaqarfiussalluni. Timersornikkut qanoq ineriartortitsitigissanera erseqqaarissunik anguniakkanik pilersaarutinillu pilersitsiffiusimassaaq.  

Kalaallit Nunaanni nunanut allanut unammisartunut tungatillugu: Kalaallit timersortartui aaqqissuussami nunat tamalaat akornganni qaffasissumik angusaqarnissaannik naatsorsuutiginnittoqassaaq. Kalaallit nunani allani unammisartuisa nunaminni aaqqissuussineq ineriartorfigilluassavaat. 

Aningaasatigut tapiinerit tapiissuteqarnernut assigiinngitsunut sisamanut avinneqarsinnaapput:

Peqataanissamut tapiinerit

Peqataanissamut tapiisoqarsinnaavoq timersuut peqataaffiginiagaq Kalaallit Nunaanni Timersoqatigiit Kattuffiata tapiinissamut piumasaqaataanik naammassinnissimappat. Peqataanissamut tunngatillugu Kalaallit Nunaanni Timersoqatigiit Kattuffiata naliliineranut inissisimaneq apeqqutaalluinnartarpoq,  soorlu kalaallit ajugaanermikkut unammisitsinermi tullermi aaqqissuisuullutik unammiffigineqarsinnaalerlutik inississinnaanerat eqqarsaatigalugu.

Najugarisami unamminerit ingerlanneqarsinnaanerinut neqerooruteqarnissamut nalinginnaasumik aningaasartuutaasarput takoqqusaarusiornerit, neqerooruteqarnermi ilisaritinnertut atugassat, angalanernut aningaasartuutit, timersornerup iluani aqutsisuusut suliffiiniit peqannginnissaannut matussusiinerit, ilinniartitsinerit aammalu inunnik oqaloqatiginneqattaarluni pisut akuerineqarnissaa anguniarlugu aalajangeeqataasussanik sunniiniarluni paasititsiniaanerit.  Kalaallit Nunaanni Timersoqatigiit Kattuffiat sukumiisumik naliliinernerup kingorna siunnersuilluni suliassamillu suliarinneqataasussaavoq. Kalaallit Nunaanni Timersoqatigiit Kattuffiata nalinginnaasumik nunani tamalaani timersuutinik ingerlatsinerit (XX) % angullugit ussassaanernut aningaasartuutinik tapiisarpoq.

Illoqarfiup/Illoqarfiit unammiffiusussat nalinginnaasumik sinneri (xx) %-it matusarpai. Unammiffiusussatut atugassat sinner Kalaallit Nunaanni Timersoqatigiit Kattuffianut, illoqarfimmullu/illoqarfinnullu unammiffiusunut tuttarput, tapiissutigineqarsimasut annertussusii aallaavigalugit naatsorsorneqartartumik. Kattuffiit pisumut attuumassuteqartut nalinginnaasumik namminneq angalanernut ataatsimiinnernullu peqataanerminnut piffissamik atuinerminnut namminneq akileeqataasarput (nunagisami nunanilu tamalaani pisuuppata).    

Piviusunngortinniakkat piareernissaannut tapiissutit

Kalaallit Nunaanni Timersoqatigiit Kattuffiat timersornermi aaqqissuussat pivisunngortinneqarnissaat qulakkeerniarlugit tapiissuteqarsinnaasarpoq, tassa pisut aningaasatigut illersorneqarsinnaasumik pitsaassuseqartumillu piareerlutik piviusunngortinneqarsinnaanissaat qulakkeerniarlugu. Piviusunngortinniakkat piareernissaannut tapiissutit pisumut missingersuutinut tamakkiisunut tunniunneqarsinnaapput, imaluunniit aaqqissuussami aalajangersimasunut atugassanngorlugit tapiisoqarsinnaavoq.

Pikkorinnerpaat aammalu amerlanerit peqataaffigisaannik timersortitsinerit

Kalaallit Nunaanni Timersoqatigiit Kattuffiat nalinginnaasumik missingersuutit 50%iat tikillugu tapiisarpoq – kommunep/nunap immikkoortuata tapiissutai ilanngunngagit – kisiannili isertitassatut piviusorsiortumik naatsorsuutigisat, soorlu peqataanissamut akiliutit, aningaasaliiniartut, isissutissanillu tunisinerit ilanngullugit naatsorsuereernerup kingorna.

Nunani tamalaani ataatsimeersuarnerit

Kalaallit Nunaanni Timersoqatigiit Kattuffiat nalinginnaasumik missingersuutit tamakkiisut (xx) %ii tikillugit tapiisarpoq, kisiannili piviusorsiortumik isertitassat, soorlu nunani tamalaani kattuffinnit tapiissutaasussat ilanngutereerlugit. Kalaallit Nunaanni Timersoqatigiit Kattuffiat pisussamut annertunerusumik tapiineq ajormat, aningaasatigut akisussaassuseq tamakkiisumik aaqqissuisumiittarpoq.

Amigartoornissamut qularnaveeqqutit

Kalaallit Nunaanni Timersoqatigiit Kattuffiat annikitsumik killilimmillu aaqqissuisut amigartoornissaannut qularnaveeqqusiisarpoq, missingersuutit annertuumik nalorninartoqartillugit. Qularnaveeqqusiinikkut aaqqissuisut annaasaqarnissaraluannut pinaveersaartitsisarpoq, aningaasatigut naatsorsuutigisaraluit arlallit iluattissanngikkaluarpata. Amigartooruteqarnissamut qularnaveeqqutaasoq aningaasanik amerlanerpaaffiusinnaasunik killiligaavoq. Amigartooruteqarnissamut qularnaveeqqutaasoq aningaasartuutinut aalajangersimasunut aaqqissuisut amigartooruteqarfigisinnaasaannut attuumassuteqakkajuppoq.

Amigartooruteqarnissamut qularnaveeqqutip suut matussusertarneraat qanorlu tassunga qinnuteqartoqartarnersoq annerusumik paasisaqarfigisinnaavatit uani linkimi.

Misissuinernut atugassat

Kalaallit Nunaanni Timersoqatigiit Kattuffiat Kalaalllit Nunaanni unammisitsinernik aaqqissuussiniartoqartinnagu pititsisoqartinnaguluunniit – tamatuma misissuiffigineqarnissaanut aningaasaliisinnaavoq. Taamatut tapiinermi uppernarsaatissanik katersinissanut aammalu suliniummut misissuisussamik atorfinitsisinermut, soorlu missingersuusiortussamut atugassanik aningaasaliisinnaavoq, soorluttaaq aaqqissuussap sunniutissai sunniutissatullu periarfissaasinnaasut, neqeroortitsinermullu pikkorissarnissamut, tassanimi piviusunngortitsissagaanni atugassarititaasut misissuiffigineqarnerinut, aammalu nunanut allanut aaqqissuisoqarneranut peqataajartornermut assigisaannullu aningaasartuuteqartoqartussaassammat.  

Kalaallit Nunaanni Timersoqatigiit Kattuffiat uppernassuseqartumik, tutsuviginartumik akisussaassuseqartumillu pissusilersorusuppoq. Tamannalu ilaatigut takuneqarsinnaasarpoq Kalaallit Nunaanni Timersoqatigiit Kattuffiata ukununnga tunngatillugu suleriaasiatigut:

Tapiinissamut nalilersuinissamut najoqqutassat aalajangersimaqqinnaartut, peqqinnassusilimmik suleqateqarnerit aammalu aaqqissuussinermi aningaasaqarneq, neqeroortitsinermi ingerlatsinermilu erseqqarissumik ingerlatsineq, pissassaatinik atuinernut politikkeqarneq kiisalu ileqqorissaarnissamut nalinginnaasumik pissuseqartoqarnissaq. Tapiiffigineqarnissamut najoqqutassat qulaani taaneqartut saniasit tapiiffigineqarnissamut piumasaqaatit aamma makkuupput:

Illoqarfimmik unammiffiusumik tapersersorneqarnissaq

Aaqqissuussinissaq aningaasatigut iliusissatigullu illoqarfimmit(-nnit)/kommunemit(kommunenit) unammiffiusussamit tapersersorneqartariaqarpoq. Illoqarfiup unammiffiusussap nalinginnaasumik Kataallit Nunaanni Timersoqatigiit Kattuffiata tapiineratulli annertutigisumik aningaasaleeqataassaaq. Unammiffiusussami sumiiffimmi atugassat neqeroorutigineqarpata, taava taakkua nalingi – aalajangersimasumik naliliinertigut – unammiffiusussap tapiineranut ilaasutut naliliiffigineqassapput.

Pisassaatitortoqarnersoq nakkutigineqassaaq/pisassaatinik atuisoqannginnissaanik politikki

Kalaallit Nunaanni Timersoqatigiit Kattuffiata aaqqissuussat taamaallaat tapiiffigisarpai pisassaatinik atuisoqannginnissaanik malittarisassat malinneqaraangata, tassunga ilanngullugu unamminerit inernerisa ingerlanneqarneri, angusanik atorunnaarsitsinerit il.il., World Anti Doping Code (WADA)-imi malittarisassat naapertorlugit, aaqqissuussinermut atatillugu nukkassaatitortoqarsimanersoq misissuisoqarsinnaavoq. Aaqqissuussat nukkassaatinik atuisoqannginnissaanik malittarisassanik World Anti-Doping Code malillugu ingerlatsinngitsunut, taamaallaat Kalaallit Nunaanni Timersoqatigiit Kattuffiannit tapiisoqarsinnaassaq, aaqqissuussisut ingerlatsitinnatik nukkassaatinik atuisoqarsinnaaneq inerteqqutinngortillugu malittarisassaliorpata,  aaqqissuussinermilu nukkassaatit atorneqarnersut paasiniarlugu misissuititsippata. Nukkassaatinik atuisoqannginnissaanut malittarisassiarineqartut Kalaallit Nunaanni nukkassaatinik atuisoqannginnissaanik aqutsisoqarfimmit akuerineqaqqaartariaqarput, Kalaallit Nunaanni Timersoqatigiit Kattuffiannit tapiiffigineqassagunik. 

Ileqqorissaarnissamik malittarisassat

Aaqqissuussaq Kalaallit Nunaanni Timersoqatigiit Kattuffiannit Elite Sport Greenland-imiillu timersorluni unamminermi ileqqorissaarnissamut malittarisassanik naammassinnissimasussaavoq. Kalaallit Nunaanni Timersoqatigiit Kattuffia aamma ataavartumik nakkutilliisarpoq timersuutinillu aaqqissuisoqartillugu ileqqorissaarnissamut malittarisassanut nutaanut naleqqissuussisuaannarluni, imaappoq aaqqissuussami nunani tamalaani atuuttumik malittarisassanik unioqqutitsisumik ingerlatsisoqarpat, aaqqissuussisoqarpat imaluunniit unioqqutitsisunik suleqateqartoqarpat aaqqissuussaq tappiiffigineqarsinnaajunnaartarpoq.

Pisortanik aningaasaliiffigineqarnissaq pisariaqarpoq

Kalaallit Nunaanni Timersoqatigiit Kattuffiata tapiiffiginerusarpai aaqqissuussat pisortanik aningaasaliiffigineqarsimasut, aningaasatigut oqimaaqatigiittumik ingerlatsinissaq piumasaqaataammat, taamaattumillu aaqqissuussat aningaasatigut iluanaarfiusussaareersutut ilisimaneqareersut tapiiffigisarnagit. Taamaakkaluartoq Kalaallit Nunaanni Timersoqatigiit Kattuffiata aaqqissuussat iluanaarutitaqartussatut ilisimaneqareersut tapiiffigisinnaavai ukununnga tunngagaangata:

• Neqerooruteqarluni iliusissanut/unammiffiusussatut tapiissutit
• Kalaallit Nunaanni Timersoqatigiit Kattuffiat ussassaarisoqarnissaanik kissaateqaraangat/aaqqissuussami tikilluaqquserpalaarnernut assigisaannullu tunngatillugu
• Kalaallit Nunaanni Timersoqatigiit Kattuffiata eqqumaffigisaanut iliuseqarnissamut atatillugu aningaasanik immikkoortitsisoqarsimagaangat

Avammut saqqummiussuineq

Aaqqissuussisut isumaqatigiissutigineqartut malillugit avammut saqqummiussuinissamut ussassaarinissamullu atugassanik Kalaallit Nunaanni Timersoqatigiit Kattuffianit atorneqarsinnaasunik tunniussaqartassaaq (Ingammik Kalaallit Nunaata timersorfiusutut avammut ussassaarutigineqarnissaanut atugassanik), soorlu:

• Kalaallit Nunaanni Timersoqatigiit Kattuffiata ilisarnaataa tusagassiuutinut ussassaarutinullu tamanut aaqqissuussamut tunngatillugu ilanngunneqartassaaq
• Tusagassiutitigut nalunaarummi oqartitsinerit/issuaanerit – ataavartumik Kalaallit Nunaanni Timersoqatigiit Kattuffiannut nassiunneqartarnissaat ilisimatitsissutitut/akuerineqartussatut
• Unamminerit ingerlaasissaattut pilersaarutini pisortatigoortumik takoqqusaarutigineqartuni
• Erfalasuusani, allagartarsuarni, ussassaarutini, iikkami apersuiffiusumi, aaqqissuussami erseqqissuutitsinissani, tusagassiutinik katersortitsinerni il.il.
• Aaqqissuussap nittartagaani allaaserisami linki ilisarnaallu uunga attavilerneqassapput gif.gl

Aaqqissuisut isumaqatigiissuteqareernerup kingorna makkua Kalaallit Nunaanni Timersoqatigiit Kattuffiannut atugassanngortissavai:

• Assit sukkulluunniit atorneqarsinnaasunngortillugit
• Isissutissat akeqanngitsut
• Tikilluaqquserpalaartumik iliutsit
• Kalaallit Nunaannit peqataasunik nunanilu tamalaani peqataasunut (timersortut, sungiusaasut, angalaqataasut il.il) apersorneqarsinnaanissaat il.il.

Uppernarsaatit il.il.

Aaqqissuussap naammassineqarnerani naatsorsuutit piareerneri naalagaaffimmik akuerisaasumik kukkunersiuisartumik kukkunersiorneqarsimallutik, nalunaarusiamillu aaqqissuussap anguniakkamik qanoq naammassinnitsigisimaneranik nassuiaanertalimmik nassiussisoqassaaq.  Aaqqissuisut aaqqissuussartik nalilersuiffigissavaat immersugassaq elektroniskeusoq atorlugu, taannalu immersugassat Kalaallit Nunaanni Timersoqatigiit Kattuffiata aaqqissuisunut nassiuttarpaa aaqqissuussaq naammassineqariitsiartorlu, tassanilu ilaatigut misilittagarilikkat nassuaatigineqartussaapput.  

Aallarniutaasumik ataatsimiinneq

Timersornerup tungaatigut aaqqissuussinissamut qinnuteqarnissaq/ingerlatsinissarluunniit sumiiffinni assigiinngitsuni pilersinnaasarpoq. Isumassarsiarlu pigineqalersimagaangat, taava suleqatissat katersornissaat siulliullugit katersorneqartariaqarput (nalinginnaasumik kattuffik/timertornermik aaqqqissuisoq, illoqarfik unammiffiusussap sinniisui aammalu Kalaallit Nunaanni Timersoqatigiit Kattuffiat eqqartueqatigiinniarlutik ataatsimeeqatigineqassapput. Ataatsimiinnermi siullermi nalilersuiffigineqartarput Kalaallit Nunaanni Timersoqatigiit Kattuffiata aaqqissuussamut tapiissuteqarsinnaanerminut periarfissai suunersut, siunnersuineq, allatigullu ikiuussinnaaneq. Kalaallit Nunaanni Timersoqatigiit Kattuffiat aaqqissukkanut ingerlanneqareerlutik piareereersimasunut tapiineq ajorpoq. Qinnuteqaat piffissaq sioqqutingaatsiarlugu nassiunneqassaaq, nalinginnaasumik aaqqissuussap ingerlanneqarnissaanut ukioq ilivitsoq sioqqullugu qinnutigineqassalluni.

Qinnuteqarneq/innersuussineq/aningaasaliiffigitinneq

Aaqqissuussaq Kalaallit Nunaanni Timersoqatigiit Kattuffiata tapiiffigisinnaasaatut nalilerneqarpat, taava qinnuteqarnissamut immersugassaq aaqqissuisussanut nassiunneqassaaq. Qinnuteqartut immersugassaq immersussavaat, qulaanilu tapiiffigineqarnissamut naammassisimasassat aallaavigalugit anguneqartussanut naatsorsorneqarsinnaasut aallaavigalugit aaqqissuunniagaq nalilersorneqassaaq. (Kalaallit Nunaanni Timersoqatigiit Kattuffiata allaffeqarfia qinnuteqarnermut tunngatillugu ikorfartuisinnaavoq.) Kalaallit Nunaanni Timersoqatigiit Kattuffiat qinnuteqaammik tigusigaangami taava allaffeqarfimmiut Kalaallit Nunaanni Timersoqatigiit Kattuffiata siulersuisuinut ingerlatitseqqiillutik aalajangiiffigisassatut innersuussisarput ataatsimiinnermi tullermi siulersuisunit naliliiffigineqarsinnaanngortillugu. Aningaasanimmi tapiiffigineqarsinnaanngorneq siulersuisuni aalajangerneqartarami. Siulersuisut qaammatit pingasukkaarlugit ataatsimiittarput, nalinginnaasumik qaammatini februarimi, maajimi, aggustimi aammalu septembarimi.

Allagaq neriorsuutaasoq

Siulersuisut tapiissuteqarnissamik aalajangiinerisa kingorna, taava allaffissortut qinnuteqartumut tapiiffigineqarnissamut neriorsuummik nassitsisarput, tassanilu aningaasat amerlassusii tapiiffigineqarnissamullu piumasaqaataasut nassuiaatigineqartarput, tassunga ilanngunneqartarpoq iluanaaruteqarnermik agguaasseqatigiinnissamut tunngatillugu ingerlaatsit suunersut, assersuutigalugu aningaasat ilaasa aalajangersimasunut atorneqarnissaannut tunngasut, Kalaallit Nunaanni Timersoqatigiit Kattuffiata ersarissuutitaanissaa, tikilluaqquserpalaarnissamut tapiissutit il.il.  

Sinneqartoorutinik agguaasseqatigiinnissamut isumaqatigiissut

Pisariaqassappat taava ilaatigut (missingersuutinut tunngatillugu) agguaasseqatigiinnissamut tunngasut isumaqatigiissutigineqartarput, tapiiffigineqarnissamullu neriorsuutigisami tikkuarneqarsinnaavoq isumaqatigiissutigisaq ullulerlugu piffissalerneqarsimanera. Sinneqartoorutinik agguaasseqatigiinnissamut tunngatillugu apeqqutaasuaannarpoq Kalaallit Nunaanni Timersoqatigiit Kattuffiata tapiissutigisaata annertussusia, pisussaq pillugu tamakkiisumik missingersuutinut naleqqiullugu, aaqqissuunniakkallu aningaasatigut ajalusoorsinnaanera il.il. Allatut isumaqatigiissuteqarsimanngikkaanni, taava taamaallaat iluanaarutinik agguaasseqatigiinnissaq isumaqatigiissutigineqartarpoq, Kalaallit Nunaanni Timersoqatigiit Kattuffiata (piviusunngortitsinissamut/suliap inaarneqarnissaanut) tapiissutaa x00.000 kr.-niuppata amerlaneruppataluunniit.  Iluanaaruteqartoqartillugu aningaasat pingasunut avinneqartarput, tassa aaqqissuussisunut 1/3, Kalaallit Nunaanni Timersoqatigiit Kattuffianut 1/3, illoqarfiullu unammiffigisap 1/3 pisarlugu.

Siunnersuineq

Neriorsuisoqartillugu iliusissatut pilersaarut aammalu anguassatut naatsorsuutigisassat erseqqarissut  Kalaallit Nunaanni Timersoqatigiit Kattuffiata siunnersuineranut misilittagaanullu tunngatillugu isumaqatigiissutigineqartarput, isumaqatigiissutigineqartarlutillu tusagassiortunut suliassat, ussassaarutit, pitsaassutsimik qulakkeerinninnerit, allassimasussat, siammarterinerit, aaqqissuussallu saniatigut pisut il.il. Aaqqissuunniakkap ingerlanneqarnissaata tungaanut ataavartumik nalunaarusiortoqartassaaq eqqartueqatigiittoqartassallunilu, aaqqissuisut Kalaallit Nunaanni Timersoqatigiit Kattuffiata akornganni. Aqutsinut naliliinerat aammalu/imaluunniit suleqatigiissitaasut naliliinerat aallaavigalugu Kalaallit Nunaanni Timersoqatigiit Kattuffiat peqataatinneqassaaq.  

Naliliineq

Aaqqissuussaq piareereerpat taava Kalaallit Nunaanni Timersoqatigiit Kattuffiat qinnuteqarsimasunut inaarutaasumik elektroniskimik immersugassamik nassitsisarpoq.

Tapiissutigisat tunniunneqarneri/a’contomik aningaasaliinerit

Tapiissutiginiakkat tunniunneqarneri nalinginnaasumik pisarput naatsorsuutit tamakkiisut tunniunneqareeraangata naliliinerlu naammassineqareeraangat, imaappoq aaqqissuussamut tapiissutit tunniunneqannginnerini taakkua Kalaallit Nunaanni Timersoqatigiit Kattuffiallu   isumaqatigiissutigineqarsimassapput, aningaasatigut pilersaarut, aaqqissuussap missingersuutaani immikkoortut pingaarnerit tamarmik takuneqarsinnaasunngorlugit, piffissaliussamullu ataqatigiinneri ersersinneqassallutik. Amigartooruteqarnissamut qulakkeerinnissutinik aningaasaliisoqarsinnaavoq, aaqqissuussamut naatsorsuutit inerneri Kalaallit Nunaanni Timersoqatigiit Kattuffiani tiguneqareeraangata. Akiliisinnaassuseqarnermut nalilersueqqissaarnerup ingerlanneqareersup takutippagu aaqqissuussisut aningaasanik a conto-mik pisariaqartitsisut, pilersaarusiornerani aaqqissuussamut attuumassuteqartumik aningaasartuuteqartoqarsimanera pillugu, taava Kalaallit Nunaanni Timersoqatigiit Kattuffiat pisariaqartoqartillugu – pisariaqartumik isumaqatigiissuteqarnerup kingorna – aningaasaliissutigisinnaavai tapiissutigineqartut 75%-iisa missaannik.  Aatsaalli suliniutinut acontomik aningaasaliisoqartarpoq aaqqissuussamut akisussaassuseq kattuffimmiippat imaluunniit kommunemiippat. Tapiissutit 25%ii aatsaat tunniunneqartarput Kalaallit Nunaanni Timersoqatigiit Kattuffiata naatsorsutuit naammassereersut akuerineqarsimasullu tigoreeraangagit.

Tapiissutinik atorunnaarsitsineq/utertitsineq (a’contomik pissarsiat ilanngullugit)

Aningaasanik tapiiffigineqarnissamik neriorsuineq atorunnaarsinneqarsinnaavoq, aaqqissuussisut pissusilersornerat allanngorluinnarpat, imaluunniit eqqunngitsunik/amigartunilluunniit paasissutissanik qinnuteqarnermi tunniussisoqarsimatillugu. A’contomik aningaasanik tigusisimasut atsiornitalimmik uppernarsartussaavaat aaqqissuussaq taamaatinneqassagaluarpat aningaasat utertittussaallutigit.

APEQQUTISSAQARPIT?

Apeqqutissaqaruit aaqqissuussalluunniit pillugu oqaloqatiginninniaruit taava Poul Petersen attaveqarfigissavat….