Timersoqatigiiffiit Kattuffiat allatut aningaasanik agguaariaaseqalersoq

Timersoqatigiit Kattuffianni siulersuisut 2021-imi upernaakkut allatut aningaasanik agguaariaaseqalernissaq aalajangiiffigaat, taannalu 1. januar 2022 atuutilerpoq.

Allatut aningaasanik agguaariaaseq Timersoqatigiit Kattuffiata aningaasanik agguaariaasianut sunniuteqartussaavoq.

Aningaasanik agguaariaatsimi Timersoqatigiit Kattuffianni kattuffiit amerlanerpaanik pitsaanerpaamillu aningaasanik atuisalernissaat siunertarineqarpoq. Taamaasillunilu Kalaallit Nunaanni timersoqatigiiffiit peqatigiiffiini timersortoqarnerulerlunilu pitsaanerusumik timersortitsisoqartalernissaa anguniagaavoq. Nunatsinni timersoqatigiiffiit kattuffiiniittut tamarmik namminneerlutik timersuutiminnik inerisaanissaannut periarfissaqartilissavagut, taamaasillutillu Timersoqatigiit Kattuffianni politikkit periusissiallu piviusunngortinneqarsinnaalissapput, kattuffiit namminneq periarfissaminnik atorluaanermikkut ineriartortitsisinnaanngortinneqalissagamik.   

Aningaasanik agguaariaatsip piumasaqaatit marluk piviusunngortittartussaavai:

1. Siullermik pingaarnerpaamillu kattuffiit tunngaviusumik ingerlatsinissaminnut taperneqartarnissaat qulakkeerneqartussaavoq, taamaasillutik tunngaviusumik sammisassaqartitsinertik ingerlatsinertillu nakkutigisinnaaniassammatigit.
2. Tullinnguullugu qularnaatsumik ineriartortitsinissaq qulakkeertussaavaat. Kattuffiit pitsaanerpaanik najoqqutassaqassapput ineriartortitsillutillu peqatigiiffimminni ilaasortaqarniarnermikkut neqerooruteqartarnermikkullu.  

Kattuffiit ineriartortinneqarnissaat anguniarneqassaaq periusissiaqartunut tapiisarnikkutaammalu ineriartortitsinermut atugassanik aningaasaateqarfeqarnikkut:

Aningaasaleeriaatsini allannguutiit pingaarnerit ukuupput:

• Tapeeriaaseq nutaaq atuutilissaaq, tassani kattuffinnut tapiissutaasartup 65%-ia tunniunneqartassagami. Aningaasaliissutillu 30% pissarsiarineqarsinnaasassapput Timersoqatigiit Kattuffiat peqatigalugu periusissialiortoqarneratigut. 5%-illu kingulliit ineriartortitsinermut atugassanik aningaasaateqarfimmut nakkartinneqartalissammut, tassungalu kattufffiit timersoqatigiillu peqatigiiffii tamarmik ataavartumik qinnuteqartarsinnaasussaassapput.
• Kattuffiit tamarmik Timersoqatigiiffiit Kattuffiat peqatigalugu periusissialiussapput. Periusissiallu ukiuni pingasuni atuuttassaapput, ukiorli siulleq misiliutitut atorneqassaaq, taamaasilluni kikkut tamarmik ingerlaaseq nutaaq ”ilikkarniassammassuk” taamaasillutillu periusissaqarluni isumaqatigiissutit aallaavigalugit sulinissaq sungiusarneqarniassammat.
• Nutaamulli ingerlaatsimut pitinnani utaqqiisaasumik 2022-imi kattuffiit 2020-imi aningaasat pissarsiarisimasamik 90%-ii tigugallassavaat, ataavartumillu tulluarsarneqalissallutik.
• Kattuffiit ilaasortaat siunissami peqatigiiffinni timersornermik aallussisut amerlassusiat malillugit kisitsisilersorneqartalissapput

Aningaasanik agguaariaaseq nutaaq pillugu sukumiinerusumik nassuaat tamakkiisoq uani atuarsinnaavarsi.