Ataatsimoorluta Aalasa Qeqqata Kommuniani siullermeerutaasumik workshoppeqartitsissaaq
Ataatsimoorluta Aalasami meeqqat tikilluaqqusaasutut qanorittuunerminnillu akuerineqarlutik timersornikkut ataatsimoornernut toqqissisimaffiusunut peqataasarnissaat takorluugarineqarpoq. Takorluugaq tamanna timersoqatigiiffinnut nunatsinniittunut tamanut workshoppeqartitsisarnikkut siaruarneqassaaq. Workshoppillu siullermeerutaasussat Qeqqata Kommuniani novembarip 11-anni 13-iannilu pissapput, kingornalu nunarput tamakkeriartuaarneqarumaarpoq.
Timersoqatigiit Kattuffiata (GIF) Kalaallit Nunaannilu UNICEF-ip Paarisa qanimut suleqatigalugu suliniutaat Ataatsimoorluta Aalasa septembarip qaammataani ukioq manna paasititsiniutigineqalerpoq. Suliniutikkut taassumuuna suliniummik taassuminnga suleqatigiissuteqartut saqqummiuppaat suliniutip timersoqatigiiffiit nunatsinniittut timersornikkut ataatsimoornerit toqqissisimaffiullutillu tamanik tikilluaqqusiffiusut pilersinnissaannut atortussaannik tunissagai, meeqqallu pisinnaatitaaffiinik nalitsinnullu naleqquttumik meeqqat pillugit isiginneriaaseqarnermik ilisimasaqalersissagai.
Workshoppeqartitsinerit siulliit Sisimiuni Maniitsumilu pissapput, sungiusaasut, timersoqatigiiffinni kajumissutsiminnik ikiuutaasartut meeqqallu toqqissisimatinneqarlutillu peqataatinneqartarnissaannut sunniuteqaqataarusuttut tamarmik tikilluaqqusaallutik.
”Sungiusaasut kajumissutsiminnillu ikiuutaasartut timersoqatigiiffimminni meeqqanik peqataatitaqartartut tamaasa workshoppinut peqataaqqullugit kajumissaarpavut, taakku tassaammata timersornikkut ataatsimoornernik toqqissisimaffiullutillu tamanik tikilluaqqusisunik pilersitsisartut. Minnerunngitsumillu timersoqatigiiffinni kajumissutsiminnik ikiuutaasalerusuttut tamaasa tikilluaqquavut. Sungiusaasuunerit, aningaaserisuunerit, siulersuisunut ilaasortaanerit imaluunniit meeqqanut tamulugassaqartitsisartuunerit sungiusariartitsisartuunerilluunniit apeqqutaatinnagu pingaarutilimmik allanngueqataasinnaavutit. Kikkulluunniimmi atorfissaqartinneqarput,” GIF-ip allaffeqarfiani pisortaq Jonas Jensen erseqqissaavoq.
Ataatsimoorluta Aalasap workshoppeqartitsinini marlunnut immikkoortoqartissavaa. Workshoppip immikkoortuinik marlunnik naammassinnittut inersimasutut toqqissisimatitsisutut ilinniarsimasunngorumaarput.
Ataatsimoorluta Aalasa illoqarfinni allani workshoppeqartitsissaaq 2024-mi 2025-milu.
Ataatsimoorluta Aalasa pillugu
Ataatsimoorluta Aalasap Timersoqatigiit Kattuffiata Kalaallit Nunaannilu UNICEF-ip Paarisa qanimut suleqatigalugu timersornikkut avatangiisit toqqissisimaffiusut, peqqissuutitsisut tamanillu tikilluaqqusisut pilersinneqarnissaat pillugu suleqatigiissutigaat. Suliniut Naalagaaffiit Peqatigiit meeqqat pillugit isumaqatigiissutaat naapertorlugu meeqqat pisinnaatitaaffiinik tunngaveqarpoq. Qeqqata Kommunia, Center for Folkesundhed i Grønland (CFG), Kalaallit Nunaata Politiivi, KNI aamma NordeaFonden iluaqutaangaarlutik suleqataapput, aningaasaliisuullutik tapersersuisuullutillu.
Uani Ataatsimoorluta Aalasa pillugu paasisaqarnerugit: https://ataatsimoorluta.gif.gl/da/om-ataatsimoorluta-aalasa/
Paasisaqarnerorusuttunut attaveqarfissaq
Uiloq Mathæussen
Timersoqatigiit Kattuffianni attaveqaqateqarnermut suliniutinullu siunnersorti
Email uiloq@gif.gl
Tlf. 348164
