Search

Sunngiffimmi aallussisartunut, torersumik aaqqissuussaasumillu ingerlatsisoqarnissaanut ataatsimiititaliaq

Kalaallit Nunaanni Timersoqatigiit Kattuffiata Aaqqiagiinngittoqartillugu eqqartuisarfiata qulakkeerniartarpaa aaqqissuussaasumik timersornerup iluani aaqqiagiinnginnerit ajunngitsumik pitsaasumillu inerniliiffigineqarnissaat. 

Taamaasilluni kattuffiit, peqatigiiffiit ilaasortaasullu, sumulluunniit aattuumassuteqanngitsumik eqqartuussinertulli ingerlanneqartumik nalaatartik ataatsimiitsitaliami naliliiffigitissinnaasarpaat, assersuutigalugu peqatigiiffiup malittarisassai isumaqatigiissutigineqanngippata, timersornermut malittarisassat paasineqarsinnaaneri assigiinngippata, peqatigiiffiulluunniit aalajangersagai assigiinngitsumik paasineqaraangata, tassunga naliliiffigineqartussanngortinneqartarput.

Sunngiffimmi aallussisartunut, torersumik aaqqissuussaasumillu ingerlatsisoqarnissaanut ataatsimiitsitaliaq pillugu annerusumik paasisaqarfigineqarsinnaavoq quppersagaq ”Sunngiffimmi aallussisartunut, torersumik aaqqissuussaasumillu ingerlatsisoqarnissaanut ataatsimiitsitaliap malittarisassai” atuaraanni.  

Aalajangersimasumik timersuutillit kattuffiini Timersoqatigiit Kattuffiannut ilaasortaasuni suliassat isumagineqartarnerannut ilitsersuut

Suliassami illuatungiliuttut suliap qanoq ingerlanneqarnissaanik suliassanillu isumaginnittoqartillugu qanoq isumaginnittoqartarneranik aamma illuatungeriit qanoq piareersarnissaminnik ilisimasaqaqqullugit ilitsersuummi matumani siunertarineqartoq tassaavoq aalajangersimasumik timersuutillit kattuffiini Timersoqatigiit Kattuffiannut ilaasortaasuni sunngiffimmi ingerlataqarnermut ileqqorissaarnissamullu ataatsimiititaliat suliassamik qanoq isumaginnittarnerannik erseqqissaanissaq.

  • Aalajangersimasumik timersuutillit unammiuaartitsisarnerminni unammisitsisarnerminnilu malittarisassaat, aalajangiisussaatitaasunut, unammiuaarnermi ataatsimiititalianut, suliareqqitassanngortitsisoqartarneranut malittarisassaqarnermullu ataatsimiititaliamut imaluunniit inatsiseqarnermik ingerlatsisunut aaqqissuussaqartartunullu assingusunut attuumassuteqartut. Aalajangersimasumik timersuutillit kattuffii klubbillu kattuffeqanngitsut namminneerlutik unammiuaartitsinermi malittarisassiortarput.

 

  • Aalajangersimasumik timersuutillit kattuffiisa sunngiffimmi ingerlataqarnermut ileqqorissaarnissamullu ataatsimiititaliaat taakkualu malittarisassaat. Aalajangersimasumik timersuutillit kattuffii namminneerlutik malittarisassiortarput.

 

  • Timersoqatigiit Kattuffianni sunngiffimmi ingerlataqarnermut ileqqorissaarnissamullu ataatsimiititaliap sulineranut tunngaviusut Timersoqatigiit Kattuffiata inatsisaani § 17-imi nanineqarsinnaapput. Malittarisassat taakku Timersoqatigiit Kattuffiata ilaasortaanut tamanut atuupput.

Tamakkua saniatigut sunngiffimmi ingerlataqarnermut ataatsimiititaliap suliassanik isumaginnittarnera Kalaallit Nunaanni eqqartuussiveqarnermi suliassat qanoq isumagineqartarnerannit annerusumik sunnigaavoq.

 

Matuma kinguliiniittut ataatsimiititaliap suliarisinnaavai:

  • Suliassanik aalajangersimasumik timersuutillit kattuffiata timersoqatigiiffiulluunniit timersortartorpalaannginneq ileqqorissaannginnerluunniit pillugu ileqqoreqqusaasa, inatsisaasa, malittarisassaasa, aalajangersagaasa allallu paasineqarnissaannut, malittarineqarnissaannut allaffissornikkulluunniit suliarineqarnissaannut tunngasunik suliaqarneq aalajangiinerlu.

 

  • Tamatuma saniatigut aaqqiagiinngissuteqartut isumaqatigiissitsiniartoqassasoq isumaqatigiissutigisimappassuk sunngiffimmi ingerlataqarnermut ileqqorissaarnissamullu ataatsimiititaliaq timersoqatigiiffiit aamma/imaluunniit inuinnaat kattuffimmut timersoqatigiiffimmulluunniit ilaasortaasut ilaasortaanngitsulluunniit aaqqiagiinngissuteqarneranni isumaqatigiissitsiniartutut atuussinnaavoq.

Imaappoq, suliassat timersoqatigiiffiit aalajangersimasumillu timersuutillit kattuffiata akornanni, timersoqatigiiffiit akornanni, timersoqatigiiffiit ilaasortaasalu akornanni kiisalu ilaasortat akornanni isumaqatigiinngissuteqarnernut tunngasinnaasarput.

 

Aammali aalajangersimasumik timersuutillit kattuffiata taassumalu ilaasortaaffigisaata kattuffiup pingaarnerup inatsisai naapertorlugit suliassaq allamit suliarineqartariaqarpat imaluunniit ataatsimiititaliap suliassaqarfiginngisaanik isumaqatigiinngissuteqartoqarluniluunniit aaqqiagiinngissuteqartoqarpat sunngiffimmi ingerlataqarnermut ileqqorissaarnissamullu ataatsimiititaliap suliassaq itigartitsissutigisinnaavaa.

Taamaattumik Timersoqatigiit Kattuffiannut ilaasortaasoq kinaluunniit Timersoqatigiit Kattuffiata inatsisaani § 17 naapertorlugu sunngiffimmi ingerlataqarnermut ileqqorissaarnissamullu ataatsimiititaliamut suliassanngortitsisinnaavoq.

Saaffiginnissutit tamarmik (pingaartumik unammilleqatigiinnermut tunngassuteqartut) siullermik ukununnga nassiunneqassapput ilisimatitsissutigineqarlutillu:

  • aalajangiisussaatitaasunut, suliareqqitassanngortitsisoqartarneranut malittarisassaqarnermullu ataatsimiititaliamut assingusunulluunniit

Inerniliinerit aalajangiunneqartullu suliareqqitassanngortinneqarsinnaapput kingornalu ukununnga nassiunneqarlutillu ilisimatitsissutigineqassallutik:

  • aalajangersimasumik timersuutillit kattuffiata sunngiffimmi ingerlataqarnermut ileqqorissaarnissamullu ataatsimiititaliaanut

Suliareqqitassanngortitsinissamilu periarfissat kingullersaat tassaavoq inerniliunneqartumik aalajangiunneqartumillu ukununnga tunniussaqarneq:

  • Timersoqatigiit Kattuffiata sunngiffimmi ingerlataqarnermut ileqqorissaarnissamullu ataatsimiititaliaanut.

Suliap ingerlanneqarnerani allaffigeqatigiinnerup qanoq pisarsimaneratut aalajangiinermik nalunaaruteqartoqassaaq. Ataatsimiititaliap nalinginnaasumik nassuiaatigineqartut marluk aallaavigisarpai – suliami illuatungeriit tamarmik nassuiaatigisaat.

Illuatungeriit tamarmik imminnut illersorsinnaatitaassapput aammalu aalajangiisussaatitaasunut, ataatsimiititaliamut aamma/imaluunniit sunngiffimmi ingerlataqarnermut ileqqorissaarnissamullu ataatsimiititaliamut oqalunnikkut saqqummiussinissaminnut periarfissaqartitaassallutik suliassiissutigisaminnillu tunngavilersuisinnaatitaassallutik. Taakkua pingasut suliassaminnik isumaginninnertik aallarnersinnaavaat akunnerminni isumaqatigiinniuteqarnissamik qinnuteqarlutik.

Suliami piumasaqaataasarpoq illuatungiliuttup toqqaannartumik pisumut/suliarineqartumut naammagittaalliutigineqartup pissutigisaanut attuumassuteqarnissaa; tassa imaappoq, tamatumunnga ”soqutiginnilluinnarnissaa”. Suliassap suliarineqarnerani pisoq/suliarineqartoq toqqaannartumik attuumassuteqarsimanngitsunut soqutiginarsilluinnarsinnaasarpoq.

Sunngiffimmi ingerlataqarnermut ileqqorissaarnissamullu ataatsimiititaliap aalajangissavaa ”soqutiginnilluinnarnermik” piumasaqaat naammassineqarnersoq. Illuatungiliuttut illersuisumik eqqartuussissuserisuusumik suliamilluunniit ilisimasalimmik sinnerlutik sassartitsisinnaatitaapput. Ataatsimiititaliaq suliassamik isumaginnissaaq eqqartuussissuserisumik akuliuttoqarnissaa pinaveersaassallugu. Suliarineqartup qanoq inerneqarnera apeqqutaatinnagu illuatungeriit eqqartuussissuserisumut suliamilluunniit ilisimasalimmut allamut aningaasartuutigineqartut nammineerlutik aningaasartuutigissavaat.

Illuatungiliuttut suliassamik saqqummiussisuusut pimoorussamik suliaqarniassapput, kisianni pisimasut tulleriiaartut ileqqoreqqusanut, inatsisinut, malittarisassanut, aalajangersakkanut attuumassuteqartunulluunniit allanut innersuussutigisassallugit.

 

Illuatungiliuttut qanoq isumaqarnertik pillugu allakkatigut akissuteqassapput, naammagittaalliuutigineqartup ilaanut erseqqissumik innersuussisinnaallutik takussutissatullu ilanngussassanik allanik nassiussisinnaallutik. Nalinginnaasumik illuatungiliuttut illuatungerisamik isumaannut oqaaseqarsinnaatitaasarput.

Sunngiffimmi ingerlataqarnermut ileqqorissaarnissamullu ataatsimiititaliamut nassiunneqartut tamarmik illuatungiliuttunuttaaq nassiunneqartassapput. Tamannali ataatsimiinnermi illuatungiliuttut takussutissatut ilanngussassanik nutaanik saqqummiussissagaangata avaqqunneqarsinnaasarpoq. Takussutissatut ilanngussat illuatungerisanut tunniunneqarsimanngitsut suliamut ilaatinneqarsinnaaneq ajorput.

Allatut isumaqatigiittoqarsimatinnagu ataatsimiinneq ataaseq nalinginnaasumik nalunaaquttap akunneranik ataatsimik sivisussuseqartarpoq. Nalunaaquttap akunnera ataaseq naammaginngikkaanni suliassamik nassiussinermut akissuteqarnermulluunniit atatillugu tamanna ilisimatitsissutigineqartariaqarpoq. Sunngiffimmi ingerlataqarnermut ileqqorissaarnissamullu ataatsimiititaliami siulittaasuusup piffissaq sivitsorneqassanersoq aalajangissavaa.

 

Sunngiffimmi ingerlataqarnermut ileqqorissaarnissamullu ataatsimiititaliamut ilaasortat ataatsimiinnissaq sioqqullugu suliassamut ilanngunneqartut atuareersimassavaat. Ataatsimiinneq aallarnerneqarpat unnerluussisuusup unnerluussummini ilanngussaminilu pingaartutut isigineqartariaqarsorisani – piumaguni taakkununnga innersuussuteqartarluni – saqqummiutissavai. Kingorna illuatungerisaat akissuteqassapput isumaminnillu taamatulli iliorlutik nassuiaateqassallutik. Takunnissimasut nalunaajaatinneqarnerat qaqutiguinnaq pisarpoq.

 

Tamatumunnga pingaartumik pissutaasoq tassaavoq takunnissimasup eqqortumik oqalunnissaanik piumasaqarfigineqarsinnaannginnera. Takunnissimasup nalunaajaatinneqarnissaa pisariaqarsorineqarpat suliassamik nassiussinermi ilisimatitsissutigineqassaaq, takunnissimasut aqqi sunillu tusagaqarfigineqarusunneri ilanngullugit ilisimatitsissutigineqassallutik.

Suliami qanoq pisariaqartitsitigineq naapertorlugu sunngiffimmi ingerlataqarnermut ileqqorissaarnissamullu ataatsimiititaliami siulittaasuusup aalajangissavaa takunnissimasumik nalunaajaatitsisoqassanersoq. Illuatungiliuttut takunnissimasumik nalunaasaatitsisoqarnissaanik ilisimatinneqarsimanngippata takunnissimasumik nalunaajaatitsiniartut naatsorsuutigisariaqarpaat illuatungerisaminnit itigartinneqarnissartik.

 

Suliassap saqqummiunneqarnerani sunngiffimmi ingerlataqarnermut ileqqorissaarnissamullu ataatsimiititaliamut ilaasortat suliap erseqqissaatigineqarnissaa anguniarlugu apeqquteqartarsinnaapput, kingornalu suliami illuatungeriit naggasiussaminnik oqaaseqaateqartinneqartarsinnaallutik. Illuatungeriit ataatsimiiffik qimappassuk ataatsimiititaliamut ilaasortat taasissapput. Nalinginnaasumik sapaatip-akunnerisa pingasut-sisamat qaangiunnerisigut suliassami illuatungeriit qanoq aalajangertoqarsimasneranik ilisimatinneqartarput. 

 

Sunngiffimmi ingerlataqarnermut ileqqorissaarnissamullu ataatsimiititaliap inerniliussaata nalunaarutigineqarnissaanut sapaatip-akunneri sisamat sioqqullugit  Timersoqatigiit Kattuffianni suliareqqitassanngortitsisoqartarneranut ataatsimiititaliamut suliareqqitassanngortitsisoqarsinnaavoq. Suliareqqitassanngortitsisoqartarneranut ataatsimiititaliamut suliareqqitassanngortitsineq nalinginnaasumik suliap inerneranut sunniuteqarneq ajorpoq.

Saaffiginnissutit tamarmik Timersoqatigiit Kattuffiata emailianut uunga apuunneqartassapput: ordensudvalget@gif.gl 

Kajumissutsimut Aaqqissuussaanermullu Ataatsimiitsitaliap malittarisassaasa I naleqqussarneqarneri

Kalaallit Nunaanni Timersoqatigiit Kattuffianni Kajumissutsimut Aaqqissuussaanermullu ataatsimiitsitaliaq tallimanik ilaasortaqartoq, ukiunilu marlunni ilaasortatut atuuttussanik sinniisoqarfik toqqaasarpoq. Ukioq akunnattumik kisitseqaraangat qinersisoqartarpoq, tassanilu siulittaasussaq ilaasortassat sisamat aammalu sinniisussat marluk toqqarneqartarput. 

 

Kalaallit Nunaanni Timersoqatigiit Kattuffianni Kajumissutsimut Aaqqissuussaanermullu ataatsimiitsitaliaq Kattuffiit iluminni Kajumissutsimut Aaqqissuussaanermullu ataatsimiitsitaliaanniit naliliiffigeqqitassatigut ingerlatitseqqiiffigineqartarpoq, kattuffigisami aalajangiunneqartut naliliiffigineqaqqittariaqartutut naliliisoqarsimasoqartillugu suliareqqitassatut ingerlatitseqqiisarfiugami. Aammali timersoqatigiiffiit/peqatigiiffiit kattuffeqanngitsut naliliisimanerinik nalileeqqiisarfiattut atuuppoq, timersoqatigiiffiup peqatigiiffiini aalajangiussaq naapertuutinngitsutut isigineqarsimatillugu ingerlatitseqqiisarfiugami. Kalaallit Nunaanni Timersoqatigiit Kattuffianni ilaasortat kisimik ataatsimiitsitaliamut tassunga suliakkiussisinnaatitaapput.

 

Imm. 2

 

Kajumissutsimut Aaqqissuussaasumullu Ataatsimiitsitaliaq aalangiisinnaassuseqartarpoq ikinnerpaamik ilaasortat pingasut ataatsimiinnermi najuukkaangata, ataatsimiitsitaliamilu isumaqatiginninngittoqartillugu amerlanerussuteqartut isumaat atuuttartussaavoq. Naligiittoqartillugu siulittaasup isumaa aalajangiisuusarpoq.

 

Imm. 3

 

Kajumissutsimut Aaqqissuussaasumullu ataatsimiitsitaliap suliassarai:

 

  1. piffissap aalajangersimasup iluani peqataasinnaajunnaarsitsinerit aalajangiiffigineqartussaatillugit aalajangiisuusarpoq, kajumissutsimut aaqqissuussaanermullu ataatsimiitsitaliap malittarisassai, inatsisit, timersornermilu malittarisassat unioqqutinneqarsimatillugit, imaluunniit timersortartorpalaanngitsumik naapertuutinngitsumillu pissusilersortoqarsimanerit pisimatillugit aalajangiisuusarami.
  2. Kattuffiit, timersoqatigiiffiit imaluunniit inuit akornganni isumaqatiginngittoqartillugu taakkua arlaata aalajangigaat ataatsimiitsitaliamut ingerlateqqinneqartarpoq.

 

  1. Aalajangiisimanerit nalinginnaasut pereeraangata piaartumik suliarinnittussaavoq. Kajumissutsimik Aaqqissuussaanermullu ataatsimiitsitaliap suliassiissutigineqartup suliarinissaa itigartissinnaavaa, Kalaallit Nunaanni Timersoqatigiit Kattuffianni malittarisassaat naapertorlugit aalajangiisoqarsimatillugu, imaluunniit pineqartoq Kajumissutsimik Aaqqissuussaanermullu ataatsimiitsitaliap avataani suliarineqartussatut naliliiffigisinnaavaa.

 

Imm. 4

 

Kajumissutsimut Aaqqissuussaanermullu ataatsimiitsitaliamut ilaasortaanerup sinniisuunerulluunniit nalaani Kalaallit Nunaanni Timersoqatigiit Kattuffiata siulersuisuini ilaasortaasoqarsinnaanngilaq. Sammineqartussamut tunngatillugu sumulluunniit attuumassuteqannginnissamut qulartitsisoqaqqusaanngilluinnarmat. Taamatullu inissisimatitsisoq ataatsimeeqataaqqusaanngilluinnarpoq.

 

Imm. 5

 

Ataatsimiitsitaliamut saaffiginnissutit tamavimmik Kalaallit Nunaanni Timersoqatigiit Kattuffuata allatseqarfia aqqutigalugu ingerlanneqartartussaapput, ataatsimiitsitaliamilu aalajangiunneqartut tassuunatiguttaaq saaffiginnittunut utertinneqartartussaapput.

 

Sunngiffimmi aallutamut attuumassuteqartillugu – pineqartut saniasigut – Kalaallit Nunaanni Timersoqatigiit Kattuffiani siulittaasup, siulittaasup tulliata aningaaserisullu pingasuullutik aalajangiiffigisinnaavaat Kalaallit Nunaanni Timersoqatigiit Kattuffiata Kajumissutsimut Aaqqissuussaanermullu ataatsimiitsitaliaanut pineqartoq suliassanngortinneqassanersoq.  

 

Imm. 5

 

Inuk kinaluunniit, timersoqatigiiffik imaluunniit kattuffik Timersoqatigiit Kattuffianut ilaasortaasoq kajumissutsimik Aaqqissuussaanermullu ataatsimiitsitaliami § 1 Imm. 3 nr. 1 – 3-mut attuumassuteqartumik suliassanngortitsisinnaavoq. Inuilli ataasiakkaat peqatigiiffiulluunniit naammagittaalliutaat pineqartup kattuffiani eqqartorneqaqqaartussaavoq. Saaffiginnissutit suliassanngortitalluunniit tamarmik Kalaallit Nunaanni Timersoqatigiit Kattuffiata kajumissutsimut aaqqissuussaanermullu ataatsimiitsitaliaani aatsaat suliarineqarsinnaapput allakkatigut saaffiginnissutaappata.

 

Imm. 6

 

Pineqartoq piukkunnaateqaraangat, taava illuatungeriit akornganni Kajumissutsimut Aaqqissuussaanermullu Ataatsimiitsitaliaq naapititsiniaanissaminut piareersimavoq.

 

Imm. 7

 

Kattuffiit arlaanni Kajumissutsimut Aaqqissuussaanermullu ataatsimiitsiliaata aalajangigaa Kalaallit Nunaanni Timersoqatigiit Kattuffianni Kajumissutsimut Aaqqissuussaanermullu Ataatsimiitsitaliamut ingerlateqqinneqartartussaavoq kattuffigisami aalajangiineq aallaavigalugu pineqartunut akissutigisat anngunneqarneriniit sapaatit akunneri sisamat qaangiutsinnagit. Illuatungeriit aalajangiussamut attuumassuteqartut kattuffigisaminni aalajangiiffigineqartumut ilanngullugu ingerlatitseqqiinissaaminnut periarfissaqarnerat pillugu aamma ilisimatinneqartussaapput.

 

Imm. 8

 

Ingerlateqqitap tiguneraniit sapaatip akunneri marluk qaangiutsinnagit nalileqqitassatut ingerteqqitaq aalajangiiffigineqarsimasussaavoq.

 

Ataatsimiitsitaliap suliarinninnermini pisumut tungasut pisariaqartitsinertik naapertorlugu illuatungeriinnut piniarsinnaavat, kattuffiit, peqatigiiffiit ilaasortallu ataasiakkaat ataatsimiitsitaliap apeqqutaanut akisussaatitaapput, nalunaarfissatullu killiliussarititaat nallertinnagu akiortorneqartussaapput.

Pineqartunit piumasaqaatigineqarsinnaavoq pineqartoq ataatsimiitsitaliami sammineqalerpat oqaatsitigut, oqarasuaatikkut imaluunniit allakkatigut saqqummiussaqarusullutik. Pineqartorli naammassiinnagassaappat, allakkatigoornissaa aalajangiunneqarsinnaavoq.

3mi taaneqareersup saniatigut suliarineqartussap ingerlanneqarnerani oqaaseqartitsisoqarnissaa pisinnaavoq, siulittaasup ilaasortalluunniit marluk tamanna piumasarippassuk.

Inuk timersoqatigiiffilluunniit kattuffimmut attuumassuteqartoq, kattuffigisap malittarisassaanik unioqqutitsisimappat imaluunniit Kajumissutsimut Aaqqissuussaanermulluunniit Ataatsimiitsitaliap malittarisassaanik unioqqutitsisimappat kattuffimminiit anisinneqassappat, kattuffialu isumaqarpat anisitaanera Kalaallit Nunaanni Timersoqatigiit Kattuffiata kattuffiinut tamanut atuutissasoq, taava kattuffiusup patsisaasoq suunersoq nasuiaatigiutigalugu, anisitaanerup sivisussusissaa il.il. innersuussutigissavai, taava Kalaallit Nunaanni Timersoqatigiit Kattuffianni Kajumissutsimut Aaqqissuussaanermullu ataatsimiitsitaliaq tamatumunnga aalajangiisuussaaq.

 

Timersoqatigiit Kattuffigisaata qinnuteqaataa malillugu Kalaallit Nunaanni Timersoqatigiit Kattuffiata kajumissutsimut aaqqissuussaanermullu ataatsimiitsitaliaa peqataasinnaajunnaarsitsinermik atorunnaarsitsisinnaavoq.

 

 

Sunngiffimmi aallutamut attuumassuteqartillugu – pineqartut saniasigut – Kalaallit Nunaanni Timersoqatigiit Kattuffiani siulittaasup, siulittaasup tulliata aningaaserisullu pingasuullutik aalajangiiffigisinnaavaat Kalaallit Nunaanni Timersoqatigiit Kattuffiata Kajumissutsimut Aaqqissuussaanermullu ataatsimiitsitaliaanut pineqartoq suliassanngortinneqassanersoq.  

Efter ansøgning, indgivet gennem specialforbundet, kan udelukkelsen ophæves af Kalaallit Nunaanni Timersoqatigiit Kattuffiats amatør- og ordens-udvalg.

Malittarisassap isumaa suunersoq isumaqatigiinngissutaappat aalajangiiffigineqartumulluunniit isumaqataanngikkaanni, taava pineqartut isumaqatiginninniaqatigalugit aalajangiinerit anguneqarsinnaapput. Isumaqatigiisitsineq anguneqarsinnaanngippat taava illuatungeriit isumaqatigiisitsiniarlutik naapititsiniaasussanik toqqaasinnaapput najoqqutassaniittut ukua malillugit:

 

Illuatungeriit tamarmik isumaqatigiisitsiniartussamik toqqaassapput, Isumaqatiginninniartussallu taakkua isumaqatigiisitsiniartussamik aamma toqqaassapput. Isumaqatigiisitsiniartussaq eqqartuussissuserisuussaaq, aammali isumaqatiginninniartitseqataasussaasut isumaqatigiisitsisussap kinaanissaa illuatungeriit akerleriissutigissagaluarpassuk taanna Nunatta Eqqartuussisoqarfianit toqqarneqarsinnaavoq. Illuatungeriit aappaat isumaqatiginninniartitassaminik toqqaareeraangat illuatungiliuttut ullut 14it qaangiutsinnagit aamma isumaqatiginninniartitassaminnik toqqaasimassapput. Illuatungiliuttut toqqaanngippata taava inuttaleereersoq piumasaqaateqarsinnaavoq Nunatta Eqqartuussisoqarfiat isumaqatiginninniartussamut iluatungiliuttussamik aamma toqqaaqqullugu.

 

Isumaqatiginninniartitsisut pisup inernissaa ilusilissavaat, eqqartuussivinnut anngunneqarsinnaanngitsoq. Isumaqatiginninniartitaasut namminneq aalajangiiffigissavaat pisoq qanoq suliarissanerlugu suliaminullu ilanngullugu suliap aningaasartuutaasa akilernissaannut kina akiliissanersoq aamma aalajangiiffigissavaat.

 

Isumaqatiginninniartitsisut pisussaafffeqarput pisoq suliarineqarsinnaasutut naliliiffigineqarneraniit sapaatip akunneri pingasut qaangiutsinnagit inerniliinissaminnut. Tamanna eqqortinneqanngippat taava illuatungeriit arlaata isumaqatiginngissutaasoq Nunatta Eqqartuussisoqarfianut suliareqqullugu, kalaallit nunatta eqqartuussisoqarfiata suliarinnissinnaanera naapertorlugu suliareqqullugu.

 

Imm. 3

 

Kajumissutsimut Aaqqissuussaanermullu ataatsimiitsitaliami malittarisassat Kalaallit Nunaanni Timersoqatigiit Kattuffiata siulersuisuinit suliarineqartussaapput sinniisoqarfimmiillu akuerineqartussaallutik, pineqartoq Kalaallit Nunaanni Timersoqatigiit Kattuffiannut anngunneqareersimappat. Tassanngaaniillu oqaaseqaatigineqartut aamma sinniisoqarfimmiittunut saqqummiunneqartussaapput.

 

Kalaallit Nunaanni Timersoqatigiit Kattuffiata sinniisoqarfiata ataatsimiinneranni ulloq 5. februar 2025 akuerineqarput.

 

 

 

Claus Nielsen

Timersoqatigiit Kattuffianni siulittaasoq

 

 

 

 

 

 

 

MALITTARISASSIAQ II KATUFFIMMI PEQATIGIIFFINNILU ILAASORTANNGORNIARAANNI MALITTARISASSAT.

Kattuffimmut ilaasortanngorniarnissamut aalajangersakkat.

 

Imm. 1 Timersuut ataaseq pineqartillugu kattuffimmut ataasiinnarmut ilaasortanngortoqarsinnaavoq.

 

Imm. 2. Timersuut peqatigiiffinnit ingerlalluartunit ikinnerpaamik tallimanik ingerlanneqartussaavoq nunattalu immikkoortuinut siaruaassimasussaapput.

 

Imm. 3. Timersuut sivisuumik atuuttussaavoq, tassa ataavartumik soqutigineqarnissaa naatsorsuutigineqarsinnaassalluni.

 

Imm.  4. Peqatigiiffiit ilaasortanngortinneqartut §2 imm. 1 – 3mi allassimasunik piviusunngortitsisussaapput.

 

Imm. 5. Malittarissassat Kalaallit Nunaanni Timersoqatigiit Kattuffiata inatsisaanut naapertuuttussaapput, peqatigiiffiup tunngaviusumik ingerlaasaatut ingerlaaseqassalluni, kajumissutsiminnik, namminersortunik, peqatigiiffittullu kikkunnulluunniit attuumassuteqarnatik tamat oqartussaanerannik aallaaveqartumik tunngaveqartussaallutik.

Timersoqatigiiffiit nutaat ilaasortanngortinnissaannut aalajangiussat.

 

Imm. 1. Peqatigiiffiup malittarisassai Timersoqatigiit Kattuffiata malittarisassaannut naapertuuttussaapput, peqatigiiffiullu tunngaviusumik ingerlaasaanut naapertuuttussaallutik, peqatigiiffeqarnerullu tungaatigut malittarisassanik nalinginnaasunik aallaaveqartussaallutik, ilaasortanngorsinnaanissarlu naapertuutinngitsumik killilersuiffigineqartussaanngilaq.

 

Imm. 2. Timersoqatigiiffimmi aallunneqartoq timikkut atuinerusussaavoq inuup ataasiakkaap timiminik, isumaliortaatsimigut, inoqatinillu peqateqarsinnaaneranik siuarsaaqataatitsisussaalluni, aallutarlu nalinginnaasumik timersorluni ingerlatatut naliliiffigineqartussaalluni. Timersornerpalaartumik oqaraanni isumaqarpoq, ilaasortaasut aallutaat annertunerpaamik tumimik nukinillu atuilluni qasujaallisaatitut nalilerneqarsinnaasussaallutik.

 

Timersoqatigiiffiit kattuffeqartut kattuffimmut ilaasortanngorniassapput, sinneri kattuffeqanngitsut Kalaallit Nunaanni Timersoqatigiit Kattuffiannut ilaasortanngorniarlutik qinnuteqartussaasut.

 

Imm. 3. Kalaallit Nunaanni Timersoqatigiit Kattuffiata malittarisassai malillugit timersoqatigiiffik Timersoqatigiit Kattuffiannut imaluunniit timersuutip kattuffianut malittarisassaminnik nassiussisussaatitaapput. Timersoqatigiiffiit Kalaallit Nunaata avataanniittut, inuilli Kalaallit Nunaannut attuumassuteqartut katersorniarlugit pilersinneqarsimasut, Kalaallit Nunaanni Timersoqatigiit Kattuffiannut ilaasortanngorniarsinnaapput, kattuffimmut nunatsinni peqatigiiffittut allatulli pisinnaatitaaffeqartitaallutik ilaasortaasinnaallutik, allatut aalajangiisoqanngippat.

 

Kalaallit Nunaanni Timersoqatigiit Kattuffiata siulersuisut ataatsimiinneranni ulloq 5. febraur 2025 akuerineqarput.

 

 

 

Claus Nielsen

Timersoqatigiit Kattuffianni siulittaasoq

 

 

MALITTARISASSIAQ III

Kalaallit Nunaanni Timersoqatigiit Kattuffianni nunatsinni pissartanngorniunnerni ataatsimoorussamik aalajangersakkat

Imm. 1 Nunatsinni pissartanngorniutsitsinissamut akuersissummik piniarluni qinnuteqaat Kalaallit Nunaanni Timersoqatigiit Kattuffiannut nassiunneqartussaavoq immikkut immersugassamik immersuinikkut, taanna immersugassaq kattuffiup allatseqarfianut piniarneqarsinnaavoq. 

 

Imm. 2 Qinnuteqaat allatseqarfiup suliarisussaavaa, pisariaqarpallu sukumiinerusumik paasissutissanik piniarsinnaatitaapput, tamatuma kingorna kattuffik nalunaarfigineqassaaq akuerineqarsimanersoq itigartinneqarsimanersorluunniit. Itigartitsissut Kalaallit Nunaanni Timersoqatigiit Kattuffata siulersuisuinut naammagittaalliutigineqarsinnaavoq.

 

Imm. 3 Siulersuisut nakkutigisarpaat nunatsinni pissartanngorniuttoqartillugu piumasaqaatit tunngavigalugit ingerlatsisoqarnersoq, pisariaqassappallu nunatsinni pissartanngortitaanerup atorunnaarsinnissaa allaat piumasaqaatigisinnaallugu.

 

Imm. 4 Kattuffiit ukiut tamaviisa Kalaallit Nunaanni Timersoqatigiit Kattuffiata allatseqarfiannut 15. januari nallertinnagu ukiumi pineqartumi nunatsinni pissartanngorniunnissat sorliit ingerlanneqarusunnersut nalunaarsuutiginiarlugu nassiussisoqartussaavoq, nunatsinnilu pissartanngorniunnerup qaangiutiinnavinnerani angusat suunersut nalunaarutigineqartussaavoq kina/kikkut nunatsinni pissartanngornersoq/pissartanngorsut.  

 

Unammineq nunatsinni pissartanngorniussutaasussaq akuerineqassaguni, taava makkua piumasaqaatit piviusunngortinneqarsimassapput:

 

  1. unammineq kattuffimmit akuerineqartumik aaqqissuunneqartussaavoq, ukiumut ataasiarluni nunatsinnilu ingerlanneqartussaalluni.

 

  1. unammineq aalaakkaasumik amerlassuseqartunik peqataaffigineqartassaaq ikinnerpaamik ukiuni tulleriiaani pingasuni, nunatsinnilu qaffasinnerpaamik piginnaaneqarfiusut akornganni ingerlanneqassalluni.

 

  1. peqataasut 14-inik ukioqalersimassapput ukiorluunniit taanna unammiffiusoq 14-inik ukioqalertussaassallutik. (Unammineq seniorit unamminerattut nalunaarutigineqarsimasussaavoq).

 

  1. Inuit ataasiakkaarlutik unamminerini ikinnerpaamik peqataasut arfinilinnik (6) amerlassuseqassapput, holdikkaartullu ikinnerpaamik peqatigiiffiit sisamat peqataasussaapput. Unammeqataasussaq ataaseq arlallilluunniit unammeqataanngitsoorsimagunik unammiartorfimmut angalanerup kinguaattoorneranik patsiseqartumik, imaluunniit napparsimanermik patsiseqartumik, taava pineqartoq unamminermut peqataasimasutut naatsorsuunneqassaaq, peqataasussatut allattorsimaffimmi allassimareeraanni, aammalu ”Tuukkaq” agguaanneqarpat tunineqartussaalluni. Tamanna aamma holdikkuutaartunut attuuppoq.

 

Imm. 2 Kattuffiusoq peqataasut amerlassusissaat angunngikkunikku immikkut akuersissummik tunineqarsinnaapput, ukiulli marluk tulleriiginnaat taamaattoqarsinnaanngilaq. Immikkut akuersissummik tunisineq Kalaallit Nunaanni Timersoqatigiit Kattuffiata siulersuisuinik immikkut akuerineqartussaavoq. Nunatsinni pissartanngorniunnerit taaneqaraangamik oqaatigineqartassaaq ”Kalaallit Nunaanni Timersoqatigiit pissartanngorniunnerat”. Timersoqatigiit ataasikkaat kattuffiisa aaqqissugaatut taaguusiisoqaqqusaanngilaq.

Peqataasut, kattuffimmut aaqqissuussisuusumut ilaasortaanngitsut, peqataasut amerlassusilerneqarnerinut ilaatinneqarsinnaanngillat, kisiannili – kattuffiusup aalajangigaanik – pissartanngorniunnermut peqataasinnaavoq, nunatsinnilu pissartanngortutut suaarutigineqarsinnaassanani. Nunani allani kattuffiit ingerlanneqartut assingini ilaasortaasut – kattuffiusup aaqqissuussisuusup aalajangigaa malillugu – inuit ataasiakkaat holdilluunniit unamminerinut ilaasinnaapput, kisiannili ”nunatsinni pissartatut” taaguuteqalersinnaanatillu Kalaallit Nunaanni Timersoqatigiit Kattuffiata ujaminik pissarsitinneqarsinnaanngillat. 

Kalaallit Nunaanni unammersuarnermi ajugaasoq ukioq ilivitsoq pissartaasarpoq. Inersimasut (seniorit) qaffasinnerpaamik inissisimasut akornganni ajugaasoq nunatsinni pissartanngortinneqarsinnaavoq Tuukkannatsinneqarlunilu.

 

Peqatigiiaarluni pissartanngorniunnerni (iligiiaani) unamminerni malittarisassat malillugit medaljannattussat amerlassusaattut amerlatigisut akissarsitinneqartassapput.  Ajugaasoq ukiumi ataatsimi pissartaasarpoq. Inersimasut (seniorit) qaffasinnerpaamik inissisimasut akornganni ajugaasoq nunatsinni pissartanngortinneqarsinnaavoq Tuukkannatsinneqarlunilu. Pissartanngoniunnerni inersimasut akornganni ajugaanerpaat Tuukkannatsinneqarsinnaapput, inersimasut akornganni qanorluunniit ukioqaraluarunik. Taaguut “nunatsinni pissartaq” aatsaat anguneqarsinnaavoq, pineqartumi unamminerit ingerlanneqarsimatillugit.

 

Kattuffiusut ukiut tamaviisa Kalaallit Nunaanni Timersoqatigiit Kattuannut ulloq 31. decembari nallertinnagu nalunaarutigisussaavaat pissartanngorniunnerit sorliit ingerlanneqassanersut, nunatsinnilu pissartanngortussanut ”Tuukkat” qassit pissarsiarineqassanersut nalunaarutigalugu.

Kattuffiusoq nunatsinni pissartanngorniutsitsisinnaavoq nunatta avataani ingerlanneqartumik Kalaallit Nunaanni Timersoqatigiit Kattuffiata siulersuisui tamatumunnga akuersisimappata.

Kattuffiit ilaasortaasut aammalu Kalaallit Nunaanni Timersoqatigiit Kattuffianni siulersuisut nunatsinni pissartanngorniunnissamut, nunanut allamut unamminissanut, unamminernulluunniit taakkununnga assersuunneqarsinnaasunut peqataasinnaajunnaarsitsiniarlutik aalajangiisinnaapput, ima sakkortutigisumik pineqaatissinneqarsimappata allaat taamatut sunniuteqartariaqartumik. Taamatut aalajangiineq kajumissutsimut aaqqissuussaanermullu ataatsimiitsitaliamut ingerlateqqillugu naliliiffigineqaqqinniarlugu ingerlanneqarsinnaavoq (appelinstansen), Kalaallit Nunaanni Timersoqatigiit Kattuffianni malittarisassani § 17-mi taaneqareersutut.

Siulersuisut timersuutini aalajangersimasuni innarluutilinnut nunatsinni pissartanngorniuttoqarnissaanik akuersisinnaapput, nunatsinni pissartanngorniunnissamut aalajangersakkat nalinginnaasut naammassineqarsimatillugit. Pissartanngorniunnerat taaguuserneqassaaq ”Kalaallit Nunaanni Timersoqatigiit Kattuffiata nunatsinni innarluutilinnut pissartanngorniuttitsinera”.

 

Kalaallit Nunaanni Timersoqatigiit Kattuffianni siulersuisut sukkulluunniit ”Nunatsinni pissartanngorniunneq” taamaatissinnaavaat akuersissutaasoq arsaarinnissutigalugu, nunatsinni pissartanngorniunnerup ingerlannissaanut akuersissummi isumannaagassat naammassineqarsinnaajunnaarsimagaangata.

 

Kalaallit Nunaanni Timersoqatigiit Kattuffiata siulersuisut ataatsimiinneranni ulloq 5. febraur 2025 akuerineqarput.

 

 

Claus Nielsen

Timersoqatigiit Kattuffianni siulittaasoq

 

MALITTARISASSIAQ IV TIMERSOQATIGIIFFIUP SUUNERATA NASSUIARNEQARNERA

Timersoqatigiiffik Kattuffigisamut atalluni qanoq aaqqissugaaneranik aammalu timersoqatigiiffiit kattuffeqanngitsut Kalaallit Nunaanni Timersoqatigiiffiit Kattuffiannut qanoq atassusigaanerinut aalajangiussat.

 

Imm. 1 Timersoqatigiiffik peqatigiiffiuvoq, ilaasortami timersorsinnaanissaannut periarfissiissalluni siunertaqartoq. Peqatigiiffiup ingerlatai timimik atuinerussapput inuillu ataasiakkaarlutik timimikkut, isumaliortaatsimikkut inoqateqarnikkullu ineriartorfiusussaq, aallutarlu nalinginnaasumik timimik atuinerusussaavoq. Timersornerpalaartuunissaa ima paasineqartariaqarpoq, aallutat pingaarnersaarissagaat, aaqqissuussap ilaasortaannik timikkut, nukinik atuinermik qasujaallisarfittulluunniit nalilerneqartussaalluni.

 

Imm. 2. Malittarisassat Kalaallit Nunaanni Timersoqatigiit Kattuffiata, kattuffigineqartullu malittarisassaanut naapertuuttussaapput, peqatigiiffeqarnerullu ileqqui malillugit kajumissutsiminnik, namminersortunik sumulluunniillu attuumassuteqanngitsunit oqartussaaqataaneq tunngavigalugu ingerlanneqartoq, nalinginnaasumillu peqatigiiffiit malittarisassarisartagaat malillugit ingerlanneqartussaq, ilaasortanngorniarusuttunullu naapertuilluanngitsumik killilersuutitaqanngitsoq.

 

Imm. 3. Timersuut ataaseq ataasiinnarmik peqatigiiffigineqassaaq.

 

Imm. 4 Aalajangersagaq atorneqartussaavoq timersoqatigiiffiup suunera paasineqarnissaalu paatsoorneqannginniassammat, timersoqatigiiffiit aammalumi ilaasortat nalunaarsorneqarnerini qanoq kisinneqartarnersut paatsoorneqannginniassammat.

 

 

 

 

 

 

Imm.5 Ilaasortatut ingerlaartutut akiliisimasut kattuffiit aammalu peqatigiiffiit kattuffeqanngitsut.  Kattuffik imaluunniit peqatigiiffik kattuffeqanngitsoq ingerlaartutut naatsorsuutigineqassaaq, kattuffik imaluunniit peqatigiiffik kattuffeqanngitsoq, Kalaallit Nunaanni Timersoqatigiit Kattuffianut ilaasortaanermut akiliisimasoq aammalu ilaasortaminik nalunaarsuisimasoq.

 

Imm. 6 Ilaasortatut ingerlaartutut ilaasortaaffimmik akiliisimasoq. Ilaasortatut ilaasortaaffimmik akiliisimasoq, naatsorsuutigineqassaaq ilaasortat ukiumi ilaasortaaffimmi akiliisimasut, minnerpaamillu qaammammi ataatsimi ukiumi ilaasortaasimasoq. Ilaasortaanermut akiliut ilaasortaaffigisamut periarfissiissaaq sammineqartumut peqataanissaminut. Aamma ilaasortaarup periarfissarissavaa taasisinnaatitaanissaq peqatigiiffiup ataatsimeersuarnerani.

 

Peqatigiiffiik ingerlaartutut naatsorsuutigineqassaaq ilaasortaminnik nalunaarsuisimappata.

 

Kalaallit Nunaanni Timersoqatigiit Kattuffiata siulersuisut ataatsimiinneranni ulloq 5. februar 2025 akuerineqarput.

 

 

Claus Nielsen

Timersoqatigiit Kattuffianni siulittaasoq

 

Aalajangiunneqarsi-masunik nassitsigit

Sunngiffimmi aallutaqartartunut, torersumik aaqqissuussaasumillu ingerlatsisoqarnissaanut ataatsimiitsitaliap inaarutaasumik aalajangiusssai pisortatigoortuupput tamanillu pissarsiarineqarsinnaallutik. Aalajangiussiffigineqarsimasunik nassittittarniaruit attavigisinnaavat Poul Petersen uunga poul@gif.gl

Sunngiffimmi aallussisartuni torersumik ingerlatsisoqarnissaanut ataatsimiititaliami ilaasortat

Johanne Tobiassen
Siulittaasoq

Poul Olsen
Ilaasortaq

Hanseraq Kleemann
Ilaasortaq

Michael Kleist
Ilaasortaq

Bernhard Olsen
Ilaasortaq

Immersugassaq immersoruk

File toqqaruk – Fil-inik toqqaasoqarsimanngilaq Nassiuguk

Annertut aningaasaliisut

Aningaasaliisut

GIF pillugu

Nutaarsiassat allaganngorlugit

GIF-imit nutaarsiassat soqutigisatit toqqaanaq e-
mail-ikkut pissarsisalikkit

’Paasissutissat illersorneqarnissaannut politikkitta’ akuerigitit, allatsinnerit ilutigalugu pissaaq.
POULTURKIS

Grønlands Idrætsforbund • Issortarfimmut 8 st. tv. Postboks 84, 3900 Nuuk, Greenland • (+299) 34 81 50 • gif@gif.gl

Vi er her for dig

Find en medarbejder

Skal du have hjælp til noget, eller har du et spørgsmål? Så find den helt rigtige medarbejder til at besvare dit spørgsmål. Klik på knappen og find en medarbejder:
Find en medarbejder

Ikiugassaavit?

Sulisumik nassaarit

Ikiugassaavit apeqqutissaqarpilluunniit? Taava sulisoq apeqqutinnut akinnillunilu ikiuisinnaasoq nassaariuk. Tuugassami sulisoq apeqqutinnut akinnissinnaasoq nassaariuk:  
Allaffeqarfik