Timersoqatigiit Kattuffiat Kalaallit Nunaanni kattuffiit kajumissutsimik ingerlanneqartut annersaraat, siullertut pingaarnertullu ”ilaasortat kattuffigaat”. Imaappoq Kalaallit Nunaanni Timersoqatigiit Kattuffiat, pingaarnersiugassat iliusissallu ilaasortanut iluaqutaasussat pillugit aalangiigaangami akisussaaffimmik tigusisartoq.
Taamaattumik Kalaallit Nunaanni Timersoqatigiit Kattuffiata anguniagaraa, kattuffiit timersoqatigiiffiillu kattuffeqanngitsut akornganni sunniuteqartarnissaq.
Kajumissuseq
Kalaallit Nunaanni Timersoqatigiit Kattuffiat ilaasortassarsiornermi, ilaasortat ilaasortaaginnarnissaannut aammalu timersornerup silarsuaani kajumissutsiminnik suliaqartut ineriartortinneqartarnissaannut pitsanngorsaaqataasussaavoq, taakkununnga ilanngunneqartussaallutik sungiusaasut aqutsisut ikiortillu iliuuseqarfigisarnissaat, taakkuami peqatigiiffeqarnermi tunngaviulluinnartumik sunniuteqartarmata, peqatigiiffinnullu peqataasoqarsinnaaneranut toqqammaviulluinnartarput taamaasillutillu anguniakkap peqataaffigineqarnissaanut tapertaasussaallutik.
Inatsisilerineq inatsisillu
Kalaallit Nunaanni Timersoqatigiit Kattuffiat eqqarsaqatigiittarnissaq anguniarlugu inatsisitigullu inatsisilerinermullu tunngatillugu ataqatigiissaarisoqarnissaanik isumaginnittussaavoq, ingammik qitiusumik kattuffiup, kattuffiit, peqatigiiffiit, kommunellu akornganni. Timersornerup tungaatigut atugassarititaasunut aaqqissuussaanernullu taakkua sunniuteqarmata.
Piginnaanngorsartitsineq
Kalaallit Nunaanni Timersoqatigiit Kattuffiat ineriartortitsisunik aaqqiissuteqartarluni ingerlatsinissamik qulakkeerisassaaq, taamaasilluni timersornerup tungaatigut kajumissutsiminnik suliaqartut ikorfartorlugillu tapersersortussaassallugit taakkua sumiiffimminni kajumissutsiminnik timersoqatigiiffinni akisussaasuunissaminnut periarfissagissaarniassammata, allaffissornikkullu ingerlatassatigut peqatigiiffilerineq oqinnerusumik ingerlanneqarsinnaanngortissallugu.
Attaveqatigiinneq
Kalaallit Nunaanni Timersoqatigiit Kattuffiat kattuffiit aammalumi peqatigiiffiit kattuffeqanngitsut, suleqatigisallu akornganni attaveqatigiittoqarnissaanut ikiuuttussaavoq, iliusissanik aallartitsisarnermigut, aammalumi kissaatigineqartut attaveqatigiilluarnissamullu pisariaqartinneqartut aallaavigalugit.
Takorluugaq pillugu aallartitaqalernissap anguniarnissaa
Kalaallit Nunaanni Timersoqatigiit Kattuffiata suleqatissatut piukkunnaatillit peqatigalugit isumassarsianik piorsaanissaq maligassiuisunillu peqalernissaq anguniarlugu 2030-imi anguniakkatut takorluukkamut takoqqusaarusiornissaq anguniarpaa. Maligassiuisoqalernissaanut toqqammaviusussanik peqalernissaq siunertaalluni, soorlu videoliornikkut, allagartaliornikkut, allagartarsualiornikkut aammalu innuttaasut attaveqaataatigut siammarterneqarsinnaasunik. Iliuseqarnikkut suleqateqarnissamut isumaqatigiissusiortarnissat ataatsimoorussamik anguniarneqarput, taamaasilluni suli amerlanerit kajumissutsiminnik suliaqarsinnaalerniassammata, maligassiuisullu takoqqusaarutiginerisigut taamatut suliaqartut ataqqiniarneqarneri malunnartillugu.
Pisoqartitsineq
Kalaallit Nunaanni Timersoqatigiit Kattuffiata suleqatigisatik peqatigalugit isumassarsiassanik piorsaanissaq, nutaanillu atuutsitsilernerit (nunanit allanit) nunaluunniit tamakkerlugu pisoqartitsisarnerit aqqutigalugit nuannersunik misigisaqartitsisarnissaq anguniarpaat, taamaasilluni pisoqartitsinerit amerlanerit pitsaanerusullu peqataasunut aaqqissuisunullu pilersinneqartarsinnaassammata. Periuseq taanna peqatigiiffiit kattuffiat, imaluunniit peqatigiiffiit kattuffeqanngitsut, kommunet, Namminersorlutilluunniit oqartussat, minnerunngitsumillu angalanissamut piareersaasut qanimut suleqatigalugit suliarineqartussaapput.
Anguniakkat
Aalariaatsit nutaat saqqummiunne-qarneratigut inuit aalanerulissap-put
Atuisunut nutaanut aalariaatsit naleqquttut timersoqatigiiffinnit neqeroorutigineqassapput
Suliffeqarfiit amerlanerit suliffimmi aalanerusinnaanissamut neqerooruteqassapput
Aalanerunissaq anguniarlugu iliuuserineqarsinnaasut pillugit oqalliffimmik pilersitsisoqassaaq
Oqartussaqarfinni suliffiit amerlanerit suliniutigisaminni timikkut aalaneq eqqarsaatigissavaat
Periusissaq 2024-27 – nuna ataatsimoorussamik anguniagalik suli paasisaqarfiginerusin-naavat
Periusissiap ingerlariusissaa, eqqarsaatersuutigisimasat aammalu qanoq aallartissanersugut paasisaqarfiginerorusuppigit? Periusissiaq tamakkiisoq aasinnaavat.
