Kalaallit Nunaata AWG-mut peqataanera takutitsilluarnerinnaananilu ujaminnannerinnaanngilaq
Arctic Winter Gamesimut peqataaneq timersorluni unamminerinnarmik takutitsiffiunngilaq, peqataanerli tamanik peqataatitsinissamik, ikinngutitaartornissamik, kulturikkut avitseqatigiinnissamik, iligiilluarnissamik, allanut takutitsilluarnissamik siunissamilu timersornikkut tunngavissinnissamik periarfissiivoq.
Kalaallit Nunaannit aallartitaallutik peqataasut timersuutinut assigiinngitsunut tallimanut peqataatitaqarput, peqatigiillu ataatsit Arctic Winter Gamesimi kalaallit kulturiannik takutitsisuullutik. Kalaallit Nunaannit aallartitaasut katillutik 65-iupput, taakkunannga amerlanerpaat tassaallutik inuusuttunnguit timersortartut.
Inuit pinnguaataannik unammiuaarnernut peqataasoq 20-nik ukiulik, Inuuteq Josefsen, timersuummini unammissutini assigiinngitsuni ujamminik sisamanik angerlaassaqartoq oqaluttuarpoq Arctic Winter Gamesimut peqataaneq ujaminnanniarnerinnarmut tunngassuteqanngitsoq, peqataanerli nunat assigiinngitsut akornanni suleqatigiinnissamut, takutitsilluarnissamut, ataqqeqatigiinnissamut ikinngutigiinnissamullu tunngassuteqartoq.
”Unammisaqattaarnerit nalaanni iligiittut tapersersoqatigiiginnanngilagut, tamattali immitsinnut tapersorpugut – allaat unammisatsinnut tapersersorlugit. Suleqatigiinnerput ataqqeqatigiinnerpullu pingaaruteqaqaaq, taamaaliornerput timersortartutut inuttullu ineriartuutigigatsigu,” Inuuteq Josefsen erseqqissaavoq.
Unammisaqattaarnerinnartigut ikinngutigiilersoqanngilaq. Aammali ammaanersiornikkut, naggataarnersiornikkut, kulturikkut avitseqatigiinnikkut aaqqissuussatigullu peqatigiinnerittaaq peqataasut unammiuaarnerup avataatigut imminnut ilinniarnissaannik periarfissaqartitsipput. Peqatigiinnerit tamakku timersortartut akornanni ataqatigiinnerulersitsipput, inuunerullu sinnerani eqqaamajuagassanik pilersitsiffiullutik.
”Aappassaanik Arctic Winter Gamesimut peqataavunga, peqataasimanikkalu tamarmik uannut pingaaruteqaqaat. Nunatsinneersunik nunanillu issittoqatitsinneersunik ikinnguterpassuaqalersimavunga. Ikinnguteqarnermalu timersuutinnik aallussinissannut kajumilersippaanga,” Inuuteq Josefsen oqaluttuarpoq.
Arctic Winter Games tassaaginnanngilaq kalaallit inuusuttaasa unammiuaartunut peqataaffigisassaat, aammali tassaavoq timersuutigisaminni unammiuaarnernut annerusunut peqataasalernissaminnut aqqutissaat. Taama isumaqarpoq Timersoqatigiit Kattuffianni siulersuisuni siulittaasoq Claus Nielsen.
”Takusarsimavagut timersortartut arlariit Arctic Winter Gamesimut peqataanermik kingornagut ineriartorsimasut. Timersortartunut piginnaanilinnut nunanit allaneersunut unammisarnermikkut misilittagarilikkatik timersornikkut qaffasissutsimikkut misilinneqaatigiinnarneq ajorpaat, aammali timersortartutut piginnaasamikkut ilungersuussamikkullu ineriartorfigisarpaat. Tamanna timersornikkut periarfissaqarnerulersitsisinnaasarpoq, aammalu nunatsinni nunanilu allani unammiuaarnernut peqataasarnissamut periarfissaqalersitsisinnaasarluni. Taamaattumik Arctic Winter Games timersornikkut unammiuaarnernut annerusunut aqqutissaasinnaavoq, taamaattumillu Timersoqatigiit Kattuffiat timersortartunik suli amerlanerusunik Arctic Winter Gamesertoqaqqinnissaanut peqataatitserusulluni sulissuteqarusuppoq,” Claus Nielsen naggasiivoq.
Arctic Winter Games tulliani Whitehorsemi Yukonimi Canadamiittumi 2026-mi pissaaq. Pilersaarutaavorlu Kalaallit Nunaata peqataaqqinnissaa. Timersuutinullu sorlernut peqataatitsinissaq kingorna paasinarsiumaarpoq.
