Peqatigiiffimmi suliassat angisuut mikisullu ataasiakkaarlutik nassuiaateqartinneqarnerat ataatsimut takunnissinnaanissamut iluaqutaasinnaavoq. Suliassaq sunik imaqarpa piffissarlu qanoq sivisutigisoq atorneqassava? Suliaqartussaq qaqugu suliaqassava sorlernillu piginnaaneqassava?

Suliassanik tamanik takunnissinnaalerlusilu nassuiaatitaqartitsileraangassi suliassat ilaasa agguaanneqarnissaat ataatsimoorluniluunniit suliarineqarnissaat, kiisalu ataatsimiititaliamit, suleqatigiinnit eqimattanilluunniit suliarineqarnissaat aalajangissallugu ajornannginnerulerajuttarpoq.

Tamanna aamma ulluinnarni suliassanut atuuppoq. Aamma imaassinnaavoq siulersuisut pilersaaruteqartut, immaqa angallatip nutaap singitsinnissaanut. Aamma holdimik nutaamik pilersitsinerusinnaavoq, peqatigiiffimmi eqimattanik nutaanik sullinniagaqalerneq imaluunniit nutaamik pilersitsiniarneq.

Isumassarsiat takorluukkallu apeqqutaatinnagit ”umiarsuit” taakku singinneqartinnatilli unittoorsinnaapput, taamaattumik pisarpoq peqatigiiffiup kikkut suliassanik isumaginninnissaat isumaginnissinnaaneralluunniit isumaliutigisimanngippagu.

Siulersuisuugajuttarput kajumissutsiminnik sulisussanik nutaanik alaatsinaallutillu nassaarlutillu apersuisartut. Peqatigiiffimmulli qanittut tamaasa ilanngukkukkit suleqatissarsiarisinnaasatit attaveqaatinniittut amerlanerulissapput. Taamaattumik ilitsersuisutut, sungiusaasutut aqutsisutullu sulillutik suleqataalersinnaasunik kikkulluunniit innersuussisinnaatitaanerminnik ilisimanninnissaat pingaaruteqarpoq.

Paasinartunngortiguk ajunngitsuusoq inuit suliassani assigiinngitsunik kajumissuseqarlutillu piginnaassuseqartut piukkunnarnissaat ajunngitsuusoq, taamaalillutik siulersuisut sulisussalersornermilluunniit suliaqartut periarfissanut eqqummaarinnerulissapput.

Allattaaq peqqusinnaavasi kajumissutsiminnik ikiuuttussanik nassaarsinnaaqqullugit aperisinnaaqqullugillu, ass.:

• Ilitsersuisussanik, sungiusaasussanik, ilitsersuisussap ikiortissaanik sungiusaasullu ikiortissaanik
• Ilitsersuisuusarsimasunik sungiusaasuusarsimasunillu
• Inunnik isumalluutaasinnaasunik
• Angajoqqaanik
• Ilaasortassanik

Siunnersuut 1: Kajumissutsiminnik sulisussanik nutaanik ujarlernermik apersuinermillu suliaqarneq peqatigitillugu naatsorsuutigisanut pakatsinissaq pinngitsoortinniarlugu malittarisassat pillugit isumaqatigiissuteqarnissaq pisariaqarsinnaavoq. Taamaattumik ilaasortanit avatangiiserisanillu siunnersuutinik katersuisussamik ataqatigiissaarisoqarnissaq attaveqaateqarnissarluunniit pitsaasuuvoq, Ataqatigiissaarisortaat nutaanut attaveqaataassaaq. Pilersaarut paasiuminartoq pitsaasumik attaveqaqateqartitsisarpoq.

Kikkunnik tamanik tikilluaqqusisuuneq kikkullu tamarmik inissaqarnerannik malugititsineq pingaaruteqarpoq. Taamaattumik kikkunnut tamanut takusassiassamik qaaqqusineq pitsaasuusinnaavoq:

• Peqatigiiffiup ukiup pisoqarfiusortaanut pilersaarutaanut atatillugu
• Peqatigiiffiup nittartagaani
• Facebookimi
• Ullormi allatsiffissami
• Naqitannguami ilaasortanut tikilluaqqussummi
• Holdinik tikilluaqqusinermi

Toqqaannartumik aperineq sunniuteqarluarnerpaagajuppoq. Taamaaliornerpit takutissavaa peqatigiiffimmi holdit iliuuseqarfigerusukkitit aamma aperisat taassumalu piginnaasai soqutigigitit.

Ilitsersuisut sungiusaasullu ikiuussinnaapput:

• ilitsersuisumut ikiuuttussamik ilitsersueqataasussamilluunniit ujarlerlutik, ass. namminneq holdigisaminnut piukkussaminnik
• ilitsersuisumut ikiuuttussamik siunnersuillutik
• ilitsersuisumut ikiuuttut nalunngisaminneersumik piukkussaminnik siunnersuuteqarsinnaapput

Malugiuk tamanna pisinnaammat siulersuisut ukuninnga marlunnik erseqqissuliorsimappata:

• Kajumissutsiminnik ikiuuttussanik sumi amigaateqarpugut?
• Peqatigiiffiup sulisussalersornermik suliassaq ataatsimoorussassaatippagu

Ilaasortat, peqatigiiffiup meerartaanut angajoqqaajusut allallu paasisaqarfiginerunissaannut pissutissat/-it alla/-t naniuk/-kkit – taannalu pingaartillugu apeqquteqarlutit.

Ilaasortat tusarnaarnerat oqaloqatiginerallu pitsaasuuvoq

• peqataanissaminnik nalunaarniarlutik sianerpata
• angajoqqaatut atisalersortarfimmi utaqqippata
• timersornermut soqutiginnivissuunerminnik takutitsippata
• timersulerituujuppata