Qeqqata Kommuniata suleqatigiissuteqarfigissavaa meeqqat inuusuttullu timiminnik atuinerulernissaat aammalu peqataatitsisumik ingerlatsisoqarnissaq eqqumaffigineqartussaavoq; peqatigiiffeqarnerup iluani, atuarfimmi illoqarfeqatigiillu avatangiisaanni malunniuteqartussamik.
Isumaqatigiissuteqartut peqatigiillutik suliniummik ingerlatsisussamik atorfinittitsisussaapput, taamaasilluni Qeqqata Kommuniani atorfinittoq Timersoqatigiiffiup Kattuffiata sinniisorissavaa peqatigiiffinnullu attaveqaatigissallugu.
”Iliuuseriniakkagut iluamik iluatsissappata sumiiffimmut katinngateqarnissarput kiisalu peqatigiiffinni, illoqarfinni nunaqarfinnilu pisunut malinnaanissagut pingaaruteqarluinnartut nalunngilluinnarpagut. Taamaattumik peqatigiilluta atorfinittitsinitsigut Nuummi allaffeqarfitsinni, kattuffinni aammalu Qeqqata Kommuniani pisariaqartitaasut kissaatigineqartullu ataqatigiissillualersinnaassallutigit neriuutigaarput.” Nuka Kleemann, Timersoqatigiiffiit Kattuffianni siulittaasoq oqarpoq.
Innuttaasut aalanerulernissaat, timersoqatigiiffinnilu peqataanerulernissaat anguniarlugit Qeqqata kommunia ukiuni kingullerni annertuunik suliniuteqarsimavoq. Meeqqat 18it tikillugit ukiullit akeqanngitsumik timersortarnissaat atuutsilersimavaat, kommunimilu atorfillit sulinermik nalaani – piffissap ilaani – kajumissutsiminnik suliniuteqartarnissaat ajornarunnaartissimallugu.
Taamaakkaluartoq Qeqqata Kommuniata nassuerutigaa innuttaasut amerlanerujussuit timersoqatigiinnut peqataanerulernissaat peqqinnarluinnartoq imaaliallaannaq angusinnaanaviarnagu.
Taamaattumik Qeqqata Kommuniata Timersoqatigiiffiit Kattuffiat isumaqatigiissusiorfigaa, Kalaallit Nunaata nunarsuarmi timi aalatillugu timimik atuinerulernerpaanngornissaata piviusunngortinnissaanut kommunetut takorluugalittut anguniagaqartutullu inissinnermigut.
”Timersoqatigiit Kattuffiata Qeqqata Kommunia kommunetut anguniagalittut takorluugaqartullu nalilermatigut soorunalimi tanngassimaarutigaarput, taamatullu naatsorsuutigineqarnitta piviusunngortinneqarnissaa tamakkiisumik anguniarumaarparput. Innuttaasugut kommunerpullu sinnerlugu angusaqarusoqaagut, isumaqarpungalu peqatigiilluta timersornerup tungaatigut kommunemilu peqatigiiffinnut pitsaalluinnartumik iliuuseqarsinnaasugut.” Malik Berthelsen, Qeqqata Kommuniani borgmesteri oqarpoq.
Timersoqatigiiffiit Kattuffiata siorna saqqummiuppaa Kalaallit Nunaat nunarsuarmi nunanit tamanit timimik aalatitsiviunerpaatut 2030-imi inissisimalissasoq, Qeqqata Kommunianillu, aammalumi kommunenik allanik suleqateqarnikkut tamatuma angunissaanut periarfissaqarluartoq isumaqarluni.
”Qeqqata Kommunianik suleqateqalernitta piorsaaffigineqaqqinnissaanut periarfissaqarluartoq isumaqarpugut. Innuttaasut peqqinnerulersut timiminnillu aalatitsinerusut takussaanerulernissaasa angunissaat kommunep periusissatut pilersaaruteqarnermigut piviusunngortikkusuppaa, peqqissutsillu nalinginnaasumik assigiiaarnerulernissaa inuuniarnikkullu pitsanngorsaanissat takorluugaraagut. Upperilluinnarparpullu timersornikkut – ingammik peqatigiiffiit peqatigalugit – sumiiffinni pissutsinik kivitsisinnaassalluta, taavalu nuannaarnermik, piumassuseqarnermik peqatigiinnermillu imalimmik nikisitsisinnaalluta upperaarput. Isumaqatigiissuteqarnitsigut peqatigiiffiit kommunellu suliaat pitsaalluinnartut aamma piorsaaffigeqqissinnaassavagut.” Nuka Kleemann naggasiilluni oqarpoq.
Kommunep takorluugaqarluni anguniagaqartutut-isumaqatigiissuteqarfiginera 2022-miit 2025-mut atuuttussaavoq.
