Timersorneq pillugu isumasioqatigiinnermi nutaaliornerunissaq sammineqassaaq

Nunatsinni timersornikkut nutaanik allaanerusunilluunniit aaqqissuisoqartalernissaata misissorneqarnissaa pillugu Ilinniartitaanermut, Kultureqarnermut, Timersornermut, Ilageeqarnermullu Naalakkersuisoq Kalaallit Nunaanni Timersoqatigiit Kattuffiat suleqatigalugu isumasioqatigiinneq ”Unammersuaarnerit”-imik taaneqartoq maajip 12-ianni 13-iannilu Nuummi ingerlanneqassaaq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisup, Peter Olsenip,  kattuffiit kiisalu timersortartut timersornerup ineriartortinneqarnissaanut timersortartullu nunani allani nunatsinnilu timersortartunut pikkorinnerusunut nallersuussinnaanerulernissaannut unammiuaariaatsit allaanerusut pisariaqartinneqarnerannik nalunaaruteqarnerisa kingunerannik isumasiortitsineq pissaaq.

“Taamatut tunuliaqutaqarnikkut Kalaallit Nunaanni allaanerusumik annertusisamilluunniit timersornikkut aaqqissuisalernissamut unammilligassat periarfissallu isumasoqatigiinnermit erseqqinnerulersinneqassapput. Ilaatigut “Final 4”-imik taaneqartartoq, semifinalit finalillu ulluni tulleriinni sumiiffimmi ataatsimi piffigisartagaat, ilaatigut Europamiut assammik-arsaattarnerannit ilisimaneqartoq assersuutitut misissuataagassaavoq”,Naalakkersuisoq Peter Olsen oqarpoq.

Kalaallit Nunaanni Timersoqatigiit Kattuffianni siulittaasup Nuka Kleemannip Naalakkersuisoq isumaqatigalugu oqaatigaa.

“Isumasioqatigiinnissaq nunnaarutigaara qilanaaralugulu, ilumoorpormi kattuffiit timersortartullu arlallit oqariartuutigisaraat unammiuaarnerit amerlanerusut pisariaqartinneqartut. Taamaammat timersuutini unammiuariaatsit tassanilu unammilligassat ineriartortinneqarsinnaasullu attuumassuteqartut peqatigalugit eqqartussavagut”, Nuka Kleemann oqarpoq.

Isumasioqatigiinnermut timersoqatigiit kattuffii, Elite Sport Greenland, kommunit kiisalu silaannakkut immakkullu angallassisartut Air Greenland aamma Arctic Umiaq Line peqataassapput, sammisamullu attuumassuteqartuummata unammilligassanik pitsanngorsaataasinnaasunillu saqqummiussissallutik. Ilaatigut unammiuaariaaseq nutaaq qanoq aaqqissuussaatikkusunneraat minnerunngitsumillu unammiuaariaatsip nutaap annertusisaasulluunniit malitsigisaanik angallannikkut periarfissatigullu annerusumik malunniutaasussatut naatsorsuutigisat  saqqummiussassaanni ilanngunneqassallutik.

Vi er her for dig

Find en medarbejder

Skal du have hjælp til noget, eller har du et spørgsmål? Så find den helt rigtige medarbejder til at besvare dit spørgsmål. Klik på knappen og find en medarbejder:

Ikiugassaavit?

Sulisumik nassaarit

Ikiugassaavit apeqqutissaqarpilluunniit? Taava sulisoq apeqqutinnut akinnillunilu ikiuisinnaasoq nassaariuk. Tuugassami sulisoq apeqqutinnut akinnissinnaasoq nassaariuk: